husn-e-lachaar ki baaten karen kya

husn-e-lāchār kī bāteñ kareñ kyā

ishq-e-bīmār kī bāteñ kareñ kyā

sogvārī chaman-e-dil par hai

barg-e-ruḳhsār kī bāteñ kareñ kyā

nār-e-dozaḳh se Darāne vaalo

ham kisī naar kī bāteñ kareñ kyā

kaise hālāt se samjhauta kiyā

ab ye be-kār kī bāteñ kareñ kyā

sab makīnoñ se ta.āruf to huā

dar-o-dīvār kī bāteñ kareñ kyā

vaj.h-e-guftār jo maujūd nahīñ

lutf-e-takrār kī bāteñ kareñ kyā

ghar kī tahzīb hai malhūz-e-nazar

ghar meñ bāzār kī bāteñ kareñ kyā

raat bhīgī hai 'shafaq' aao ab

ḳhvāb-e-bedār kī bāteñ kareñ kyā

husn-e-lachaar ki baaten karen kya

ishq-e-bimar ki baaten karen kya

sogwari chaman-e-dil par hai

barg-e-ruKHsar ki baaten karen kya

nar-e-dozaKH se Darane walo

hum kisi nar ki baaten karen kya

kaise haalat se samjhauta kiya

ab ye be-kar ki baaten karen kya

sab makinon se taaruf to hua

dar-o-diwar ki baaten karen kya

wajh-e-guftar jo maujud nahin

lutf-e-takrar ki baaten karen kya

ghar ki tahzib hai malhuz-e-nazar

ghar mein bazar ki baaten karen kya

raat bhigi hai 'shafaq' aao ab

KHwab-e-bedar ki baaten karen kya