husn-e-nawa-e-shauq ki ta’mil kar chale

husn-e-navā-e-shauq kī tā’mīl kar chale

sar ko uThā.e 'ahd kī takmīl kar chale

ḳhākī badan ko ātish-e-dā.im kī lau pe rakh

hiddat barā-e-jān kī tarsīl kar chale

dardoñ-bharī darīda ridā-e-hayāt ko

taane se baanā joḌ ke zambīl kar chale

nuurī tajalliyāt ko parvāz-o-par diye

apne taḳhayyulāt ko jibrīl kar chale

apnī anā-e-hosh kā saudā nahīñ kiyā

pur-josh rah ke ḳhauf kī tazlīl kar chale

kal shab tire ḳhayāl ke pahlū meñ baiTh kar

ġham-hā-e-rozgār se tā’tīl kar chale

maiñ ne sadā-e-haq ko kiyā sarbuland aur

baaqī tamām kaam abābīl kar chale

dil kī jabīñ ko aap kī chaukhaT pe Tek kar

āñkhoñ ko intizār meñ tahlīl kar chale

gahrī siyāh raat meñ ḳhud ko jalā ke ham

misl-e-misāl-e-raushnī tamsīl kar chale

andar kī chup ko kis ne 'atā kar dī dhaḌkaneñ

'hasrat' na.ī zabān meñ tafsīl kar chale

husn-e-nawa-e-shauq ki ta’mil kar chale

sar ko uThae 'ahd ki takmil kar chale

KHaki badan ko aatish-e-daim ki lau pe rakh

hiddat bara-e-jaan ki tarsil kar chale

dardon-bhari darida rida-e-hayat ko

tane se bana joD ke zambil kar chale

nuri tajalliyat ko parwaz-o-par diye

apne taKHayyulat ko jibril kar chale

apni ana-e-hosh ka sauda nahin kiya

pur-josh rah ke KHauf ki tazlil kar chale

kal shab tere KHayal ke pahlu mein baiTh kar

gham-ha-e-rozgar se ta’til kar chale

main ne sada-e-haq ko kiya sarbuland aur

baqi tamam kaam ababil kar chale

dil ki jabin ko aap ki chaukhaT pe Tek kar

aankhon ko intizar mein tahlil kar chale

gahri siyah raat mein KHud ko jala ke hum

misl-e-misal-e-raushni tamsil kar chale

andar ki chup ko kis ne 'ata kar di dhaDkanen

'hasrat' nai zaban mein tafsil kar chale