husn jo rang KHizan mein hai wo pahchan gaya

husn jo rañg ḳhizāñ meñ hai vo pahchān gayā

fasl-e-gul jā mire dil se tirā armān gayā

tū ḳhudāvand-e-mohabbat hai maiñ pahchān gayā

dil sā ziddī tirī nazroñ kā kahā maan gayā

ā.ina-ḳhāna se hotā huā hairān gayā

ḳhud-farāmosh huā jo tumheñ pahchān gayā

ab to mai-ḳhāna-e-ulfat meñ chalā aayā huuñ

us se kyā bahs rahā yā merā īmān gayā

apne dil se bhī chhupāne kī thī koshish kyā kyā

vo mirā hāl-e-mohabbat jise tū jaan gayā

hai yahī hukm to ta.amīl kareñge sāhab

na kareñge tumheñ ham yaad jo dil maan gayā

chhin gayā kaif bahakte hue kam-zarfoñ meñ

mai-kade se bhī gayā maiñ to pareshān gayā

na milā chain kisī haal meñ majbūroñ ko

muskurā.e to har ik shaḳhs burā maan gayā

apnī rau meñ jo bahā.e liye jaatā thā hameñ

vo zamāna vo tamannāoñ kā tūfān gayā

jhuk ke chūmī jo zamīñ us kī galī kī ham ne

kufr chīḳhā ki sambhālo mirā īmān gayā

tīliyāñ ḳhuun se tar dekhīñ qafas kī jo 'sabā'

apnī sūkhī huī āñkhoñ pe mirā dhyān gayā

husn jo rang KHizan mein hai wo pahchan gaya

fasl-e-gul ja mere dil se tera arman gaya

tu KHudawand-e-mohabbat hai main pahchan gaya

dil sa ziddi teri nazron ka kaha man gaya

aaina-KHana se hota hua hairan gaya

KHud-faramosh hua jo tumhein pahchan gaya

ab to mai-KHana-e-ulfat mein chala aaya hun

us se kya bahs raha ya mera iman gaya

apne dil se bhi chhupane ki thi koshish kya kya

wo mera haal-e-mohabbat jise tu jaan gaya

hai yahi hukm to tamil karenge sahab

na karenge tumhein hum yaad jo dil man gaya

chhin gaya kaif bahakte hue kam-zarfon mein

mai-kade se bhi gaya main to pareshan gaya

na mila chain kisi haal mein majburon ko

muskurae to har ek shaKHs bura man gaya

apni rau mein jo bahae liye jata tha hamein

wo zamana wo tamannaon ka tufan gaya

jhuk ke chumi jo zamin us ki gali ki hum ne

kufr chiKHa ki sambhaalo mera iman gaya

tiliyan KHun se tar dekhin qafas ki jo 'saba'

apni sukhi hui aankhon pe mera dhyan gaya