husn ka haal ye ba-dida-e-tar dekha hai

husn kā haal ye bā-dīda-e-tar dekhā hai

dar-ba-dar ḳhāk-basar shām-o-sahar dekhā hai

in gunahgār nigāhoñ ne jidhar dekhā hai

ek ujḌā huā sapnoñ kā nagar dekhā hai

dil-e-ḳhush-fahm ne ik ḳhvāb-e-shajar dekhā hai

shomī-e-baḳht ki be-barg-o-samar dekhā hai

dād-ḳhvāhī kī nahīñ ahl-e-chaman ko taufīq

jaan dene meñ asīroñ ne mafar dekhā hai

āḳhir-e-kār huā qaid-e-zamīñ se āzād

māh-o-anjum ne ye iqdām-e-bashar dekhā hai

maslahat-kosh rafīqoñ se hai duurī lāzim

na hue vaqt pe vo sīna-sipar dekhā hai

jaise ho ġhaib se muzhda koī aane vaalā

maiñ ne paiham kabhī yuuñ jānib-e-dar dekhā hai

husn ka haal ye ba-dida-e-tar dekha hai

dar-ba-dar KHak-basar sham-o-sahar dekha hai

in gunahgar nigahon ne jidhar dekha hai

ek ujDa hua sapnon ka nagar dekha hai

dil-e-KHush-fahm ne ek KHwab-e-shajar dekha hai

shomi-e-baKHt ki be-barg-o-samar dekha hai

dad-KHwahi ki nahin ahl-e-chaman ko taufiq

jaan dene mein asiron ne mafar dekha hai

aaKHir-e-kar hua qaid-e-zamin se aazad

mah-o-anjum ne ye iqdam-e-bashar dekha hai

maslahat-kosh rafiqon se hai duri lazim

na hue waqt pe wo sina-sipar dekha hai

jaise ho ghaib se muzhda koi aane wala

main ne paiham kabhi yun jaanib-e-dar dekha hai