husn ka hai kaisa ye bazar tere shahr mein

husn kā hai kaisā ye bāzār tere shahr meñ

jis ne dekhā ho gayā bīmār tere shahr meñ

aa ga.e haiñ ham bhī ai sarkār tere shahr meñ

dil meñ le ke hasrat-e-dīdār tere shahr meñ

tum pe hī mauqūf hai zauq-e-tajallī is liye

arsh se haiñ farsh tak anvār tere shahr meñ

jab vafā kā zikr apnoñ ne kiyā to daf.atan

ham ko yaad aane lage aġhyār tere shahr meñ

kam-nigāhī kā zamāne kī bhalā shikva hī kyā

ham se to apne bhī haiñ bezār tere shahr meñ

shaam hī se hai mirī nazroñ meñ ai 'ḳhālid' ayaañ

sub.h kā vo hashr hāl-e-zār tere shahr meñ

husn ka hai kaisa ye bazar tere shahr mein

jis ne dekha ho gaya bimar tere shahr mein

aa gae hain hum bhi ai sarkar tere shahr mein

dil mein le ke hasrat-e-didar tere shahr mein

tum pe hi mauquf hai zauq-e-tajalli is liye

arsh se hain farsh tak anwar tere shahr mein

jab wafa ka zikr apnon ne kiya to dafatan

hum ko yaad aane lage aghyar tere shahr mein

kam-nigahi ka zamane ki bhala shikwa hi kya

hum se to apne bhi hain bezar tere shahr mein

sham hi se hai meri nazron mein ai 'KHalid' ayan

subh ka wo hashr haal-e-zar tere shahr mein