husn ka sadqa utara jaega

husn kā sadqa utārā jā.egā

phir koī be-jurm maarā jā.egā

zikr hai mansūr ke anjām kā

kaun suulī se guzārā jā.egā

merī kashtī Duub jā.egī jahāñ

paañv chhūne ko kināra jā.egā

bahr-e-bāzī sāmne koī sahī

kaun sī sūrat se haarā jā.egā

rote rote hañste hañste har tarah

zindagī tujh ko guzārā jā.egā

Dūbne vaale se bhāgegā vo duur

jis kisī ko bhī pukārā jā.egā

kyā ḳhabar thī aur bigḌegā jahāñ

jis qadar is ko sañvārā jā.egā

chaudhvīñ kā chāñd sadqe kī tarah

tere chehre se utārā jā.egā

hazrat-e-'manzil' ye sochā hai kabhī

kuchh na kuchh hai vo bhī chārā jā.egā

husn ka sadqa utara jaega

phir koi be-jurm mara jaega

zikr hai mansur ke anjam ka

kaun suli se guzara jaega

meri kashti Dub jaegi jahan

panw chhune ko kinara jaega

bahr-e-bazi samne koi sahi

kaun si surat se haara jaega

rote rote hanste hanste har tarah

zindagi tujh ko guzara jaega

Dubne wale se bhagega wo dur

jis kisi ko bhi pukara jaega

kya KHabar thi aur bigDega jahan

jis qadar is ko sanwara jaega

chaudhwin ka chand sadqe ki tarah

tere chehre se utara jaega

hazrat-e-'manzil' ye socha hai kabhi

kuchh na kuchh hai wo bhi chaara jaega