husn ka talib agar hai ishq ke aazar khinch

husn kā tālib agar hai ishq ke āzār khīñch

sadma-e-hijr-e-masīhā ai dil-e-bīmār khīñch

jāñ-nisāroñ par na zālim har ghaḌī talvār khīñch

ḳhuun se apne vafādāroñ ke haath ai yaar khīñch

ruḳh par āñchal kā na parda ai parī-ruḳhsār khīñch

dīda-e-ushshāq par ai gul na yuuñ dīvār khīñch

mard-e-maidān-e-mohabbat hai to ai rustam nikal

kuchh sakat ho to kamān-e-abrū-e-ḳhamdār khīñch

āshiq-e-rū-e-butāñ ko nighat-e-gul se ġharaz

ho sake to ai sabā itr-e-gul-e-ruḳhsār khīñch

hai jo har sūrat meñ manzūr us kā nazzāra tujhe

ġhāfil āñkhoñ se tū apne parda-e-pindār khīñch

hashr ko arsa hai kyā is va.ade ko bhī dekh leñ

ḳhair thoḌī aur iizā ai dil-e-bīmār khīñch

der se hāzir haiñ qātil ma.arka meñ kushtanī

pesh-o-pas kis baat kā hai myaan se talvār khīñch

saath ġhairoñ ke na jā sair-e-chaman ko ai hasīn

mujh ko kāñToñ par na tū ai ġhairat-e-gul-zār khīñch

ho gayā kyā sāya-e-bāl-e-humā saaya tirā

is qadar duur aap ko mujh se na ai dīvār khīñch

sab pe yaksāñ chashm-e-rahmat terī saaqī chāhiye

is taraf bhī to nigāh-e-nāz kī talvār khīñch

sūrat-e-tasvīr hairāñ ho gayā hai aap vo

kyā kahūñ maanī se maiñ tasvīr-e-rū-e-yār khīñch

ai mirī taqdīr ab le chal madīne kī taraf

jazba-e-dil jānib-e-bat.hā mujhe ik baar khīñch

hūreñ le jā.eñgī pairāhan basāne ke liye

itr ḳhāk-e-pāk-e-taiba kā to ai attār khīñch

ai zuleḳhā hai ye ādāb-e-mohabbat se ba-sad

shahr-e-kan.ān se na yūsuf ko sū-e-bāzār khīñch

ham se dīvānoñ kī hai jāgīr meñ taiba kā dasht

ai junūñ majnūñ hī ko tū jānib-e-kohsār khīñch

hai javār-e-hazrat-e-mahbūb-e-haq 'akbar' kī jā

jānib-e-jannat na ai rizvān ise zinhār khīñch

husn ka talib agar hai ishq ke aazar khinch

sadma-e-hijr-e-masiha ai dil-e-bimar khinch

jaan-nisaron par na zalim har ghaDi talwar khinch

KHun se apne wafadaron ke hath ai yar khinch

ruKH par aanchal ka na parda ai pari-ruKHsar khinch

dida-e-ushshaq par ai gul na yun diwar khinch

mard-e-maidan-e-mohabbat hai to ai rustam nikal

kuchh sakat ho to kaman-e-abru-e-KHamdar khinch

aashiq-e-ru-e-butan ko nighat-e-gul se gharaz

ho sake to ai saba itr-e-gul-e-ruKHsar khinch

hai jo har surat mein manzur us ka nazzara tujhe

ghafil aankhon se tu apne parda-e-pindar khinch

hashr ko arsa hai kya is wade ko bhi dekh len

KHair thoDi aur iza ai dil-e-bimar khinch

der se hazir hain qatil marka mein kushtani

pesh-o-pas kis baat ka hai myan se talwar khinch

sath ghairon ke na ja sair-e-chaman ko ai hasin

mujh ko kanTon par na tu ai ghairat-e-gul-zar khinch

ho gaya kya saya-e-baal-e-huma saya tera

is qadar dur aap ko mujh se na ai diwar khinch

sab pe yaksan chashm-e-rahmat teri saqi chahiye

is taraf bhi to nigah-e-naz ki talwar khinch

surat-e-taswir hairan ho gaya hai aap wo

kya kahun mani se main taswir-e-ru-e-yar khinch

ai meri taqdir ab le chal madine ki taraf

jazba-e-dil jaanib-e-batha mujhe ek bar khinch

huren le jaengi pairahan basane ke liye

itr KHak-e-pak-e-taiba ka to ai attar khinch

ai zuleKHa hai ye aadab-e-mohabbat se ba-sad

shahr-e-kanan se na yusuf ko su-e-bazar khinch

hum se diwanon ki hai jagir mein taiba ka dasht

ai junun majnun hi ko tu jaanib-e-kohsar khinch

hai jawar-e-hazrat-e-mahbub-e-haq 'akbar' ki ja

jaanib-e-jannat na ai rizwan ise zinhaar khinch