husn kabe ka hai koi na sanam-KHane ka

husn ka.abe kā hai koī na sanam-ḳhāne kā

sirf ik husn-e-nazar hai tire dīvāne kā

ishq rusvā bhī hai majbūr bhī dīvāna bhī

aur abhī ḳhair se āġhāz hai afsāne kā

kār-farmā tire jalvoñ kī kashish hai varna

sham.a se duur kā rishta nahīñ parvāne kā

yahī takmīl-e-mohabbat kī hai manzil shāyad

hosh apnā mujhe baaqī hai na begāne kā

kaun samjhegā mire dard-e-mohabbat ko yahāñ

hai haqīqat magar andāz hai afsāne kā

husn ḳhud sarf-e-tamāshā ho do-ālam kyā hai

parda uTThe to sahī ishq ke dīvāne kā

sub.h kī chhāñv meñ chauñke to haiñ ġhāfil lekin

sham.a kā sog ki mātam kareñ parvāne kā

tum ne barbād kiyā bhī to is ehsān ke saath

jaise muddat se mujhe shauq thā miT jaane kā

dasht-e-ġhurbat se palaTtā huuñ maiñ jab sū-e-vatan

pūchh letā huuñ nishāñ barq se kāshāne kā

jhilmilāte hue tāroñ pe ye hotā hai gumāñ

ye bhī ik rang hai goyā mire afsāne kā

ahl-e-mai-ḳhāna liye phirte haiñ āñkhoñ meñ 'adīb'

reza-reza mire TuuTe hue paimāne kā

husn kabe ka hai koi na sanam-KHane ka

sirf ek husn-e-nazar hai tere diwane ka

ishq ruswa bhi hai majbur bhi diwana bhi

aur abhi KHair se aaghaz hai afsane ka

kar-farma tere jalwon ki kashish hai warna

shama se dur ka rishta nahin parwane ka

yahi takmil-e-mohabbat ki hai manzil shayad

hosh apna mujhe baqi hai na begane ka

kaun samjhega mere dard-e-mohabbat ko yahan

hai haqiqat magar andaz hai afsane ka

husn KHud sarf-e-tamasha ho do-alam kya hai

parda uTThe to sahi ishq ke diwane ka

subh ki chhanw mein chaunke to hain ghafil lekin

shama ka sog ki matam karen parwane ka

tum ne barbaad kiya bhi to is ehsan ke sath

jaise muddat se mujhe shauq tha miT jaane ka

dasht-e-ghurbat se palaTta hun main jab su-e-watan

puchh leta hun nishan barq se kashane ka

jhilmilate hue taron pe ye hota hai guman

ye bhi ek rang hai goya mere afsane ka

ahl-e-mai-KHana liye phirte hain aankhon mein 'adib'

reza-reza mere TuTe hue paimane ka