husn ki bewafaiyan tauba

husn kī bevafā.iyāñ tauba

ishq kī sar-girāniyāñ tauba

muzmahil qalb muntashir īmāñ

muztarib naujavāniyāñ tauba

hai ra.ūnat kā ā.īna shashdar

uf tirī ḳhud-numā.īyāñ tauba

ek be-nām sī ḳhalish shāyad

aur ḳhirad kī gavāhiyāñ tauba

rāste haiñ junūñ ke miltī haiñ

ūñchī nīchī sī khā.iyāñ tauba

lab-e-kashmīr par machaltī haiñ

kuchh sulagtī kahāniyāñ tauba

ajnabī rah-guzar meñ bikhrī haiñ

zindagī kī nishāniyāñ tauba

āñdhiyoñ meñ charāġh raushan haiñ

aql kī mehrbāniyāñ tauba

vo mahakte hue ḳhayāl mire

vo tirī bad-gumāniyāñ tauba

aarzū kā 'azīz' tāj-mahal

zindagī kī tabāhiyāñ tauba

husn ki bewafaiyan tauba

ishq ki sar-giraniyan tauba

muzmahil qalb muntashir iman

muztarib naujawaniyan tauba

hai raunat ka aaina shashdar

uf teri KHud-numaiyan tauba

ek be-nam si KHalish shayad

aur KHirad ki gawahiyan tauba

raste hain junun ke milti hain

unchi nichi si khaiyan tauba

lab-e-kashmir par machalti hain

kuchh sulagti kahaniyan tauba

ajnabi rah-guzar mein bikhri hain

zindagi ki nishaniyan tauba

aandhiyon mein charagh raushan hain

aql ki mehrbaniyan tauba

wo mahakte hue KHayal mere

wo teri bad-gumaniyan tauba

aarzu ka 'aziz' taj-mahal

zindagi ki tabahiyan tauba