husn ki dilkashi nahin jati

husn kī dilkashī nahīñ jaatī

aañkh kī tishnagī nahīñ jaatī

aap kī sādgī nahīñ jaatī

is liye dilkashī nahīñ jaatī

terī zulfoñ ke pech-o-ḳham tauba

merī dīvāngī nahīñ jaatī

baat kyā hai mire nasheman se

barq kī dushmanī nahīñ jaatī

taḳhta-e-dār ho ki qaid-e-rasan

ishq kī ḳhud-sarī nahīñ jaatī

ḳhvāh rusvā sahī zamāne meñ

azmat-e-āshiqī nahīñ jaatī

husn kī chashm-e-mai-chakāñ tauba

ḳhvāhish-e-mai-kashī nahīñ jaatī

baat dil kī na pūchhiye 'aḳhtar'

baat dil kī kahī nahīñ jaatī

husn ki dilkashi nahin jati

aankh ki tishnagi nahin jati

aap ki sadgi nahin jati

is liye dilkashi nahin jati

teri zulfon ke pech-o-KHam tauba

meri diwangi nahin jati

baat kya hai mere nasheman se

barq ki dushmani nahin jati

taKHta-e-dar ho ki qaid-e-rasan

ishq ki KHud-sari nahin jati

KHwah ruswa sahi zamane mein

azmat-e-ashiqi nahin jati

husn ki chashm-e-mai-chakan tauba

KHwahish-e-mai-kashi nahin jati

baat dil ki na puchhiye 'aKHtar'

baat dil ki kahi nahin jati