husn ki fitrat mein dil-azariyan

husn kī fitrat meñ dil-āzāriyāñ

us pe zālim nit na.ī tayyāriyāñ

sādgī meñ aa ga.iiñ dil-dāriyāñ

phuul uThīñ ik phuul meñ phul-vāriyāñ

muttasil tiflī se āġhāz-e-shabāb

ḳhvāb ke āġhosh meñ bedāriyāñ

chārasāzoñ kī vo qātil ġhaflateñ

dard-mandoñ kī vo ġhairat-dāriyāñ

bas hujūm-e-shauq ab is bhiiḌ meñ

khoī jaatī haiñ mirī ḳhud-dāriyāñ

soch kar un kī galī meñ jaa.e kaun

be-irāda hotī haiñ tayyāriyāñ

un kī āñkhoñ meñ bhī aañsū aa ga.e

chhoḌiye bhī ab ġharīb-āzāriyāñ

dard-e-dil aur jān-levā pursisheñ

ek bīmārī kī sau bīmāriyāñ

aur dīvāne ko dīvāna banāo

allāh allāh itnī ḳhātir-dāriyāñ

khīñch detī haiñ ḳhat-e-mauj-e-sharāb

mad-bharī āñkhoñ meñ rañgīñ dhāriyāñ

ishq aur zideñ ye rasm o raah kī

haa.e duniyā uf rī duniyā-dāriyāñ

bañdh rahā hai ai 'razā' raḳht-e-safar

ho rahī haiñ kuuch kī tayyāriyāñ

husn ki fitrat mein dil-azariyan

us pe zalim nit nai tayyariyan

sadgi mein aa gain dil-dariyan

phul uThin ek phul mein phul-wariyan

muttasil tifli se aaghaz-e-shabab

KHwab ke aaghosh mein bedariyan

chaarasazon ki wo qatil ghaflaten

dard-mandon ki wo ghairat-dariyan

bas hujum-e-shauq ab is bhiD mein

khoi jati hain meri KHud-dariyan

soch kar un ki gali mein jae kaun

be-irada hoti hain tayyariyan

un ki aankhon mein bhi aansu aa gae

chhoDiye bhi ab gharib-azariyan

dard-e-dil aur jaan-lewa pursishen

ek bimari ki sau bimariyan

aur diwane ko diwana banao

allah allah itni KHatir-dariyan

khinch deti hain KHat-e-mauj-e-sharab

mad-bhari aankhon mein rangin dhaariyan

ishq aur ziden ye rasm o rah ki

hae duniya uf ri duniya-dariyan

bandh raha hai ai 'raza' raKHt-e-safar

ho rahi hain kuch ki tayyariyan