husn kis roz humse saf hua

husn kis roz ham se saaf huā

gunah-e-ishq kab mu'āf huā

le liyā shukr kar ke saaqī se

dard is meñ huā ki saaf huā

teġh-e-qātil par apnā ḳhuuñ jam kar

maḳhmal-e-surḳh kā ġhilāf huā

zahr parhez ho gayā mujh ko

dard darmāñ se almuzāf huā

ḳhāksārī kī ho chukī me'rāj

siina apnā zamīn-e-sāf huā

kamar-e-yār ne dikhā.ī aañkh

mardum-e-dīda ḳhāl-e-nāf huā

vā'da jhūTā nakarda mard nahīñ

qaul se fe'l jab ḳhilāf huā

fātiha ko jo vo parī aa.ī

sañg-e-qabr apnā koh-e-qāf huā

us kamar ke subūt meñ 'ājiz

fikr kar kar ke mūshigāf huā

riñd-mashrab huuñ mujh ko kyā hove

maz.haboñ meñ jo iḳhtilāf huā

vo dahan huuñ na niklā harf-e-ġhurūr

vo zabāñ huuñ na jis se laaf huā

gird is kūcha ke phirā 'ātish'

haajī se kā'ba kā tavāf huā

husn kis roz hum se saf hua

gunah-e-ishq kab mu'af hua

le liya shukr kar ke saqi se

dard is mein hua ki saf hua

tegh-e-qatil par apna KHun jam kar

maKHmal-e-surKH ka ghilaf hua

zahr parhez ho gaya mujh ko

dard darman se almuzaf hua

KHaksari ki ho chuki me'raj

sina apna zamin-e-saf hua

kamar-e-yar ne dikhai aankh

mardum-e-dida KHal-e-naf hua

wa'da jhuTa nakarda mard nahin

qaul se fe'l jab KHilaf hua

fatiha ko jo wo pari aai

sang-e-qabr apna koh-e-qaf hua

us kamar ke subut mein 'ajiz

fikr kar kar ke mushigaf hua

rind-mashrab hun mujh ko kya howe

mazhabon mein jo iKHtilaf hua

wo dahan hun na nikla harf-e-ghurur

wo zaban hun na jis se laf hua

gird is kucha ke phira 'atish'

haji se ka'ba ka tawaf hua