حسن کو آخر خیال فیض عام آ ہی گیا

حسن کو آخر خیال فیض عام آ ہی گیا

آج کوئی خود بخود بالائے بام آ ہی گیا

گردش تقدیر آخر کیف پرور ہو گئی

محفل ساقی میں مجھ تک دور جام آ ہی گیا

حسن کی ہر پیشکش اب رائیگاں جانے لگی

عشق کو آخر خیال انتقام آ ہی گیا

کچھ نہ تھا پرواز میں شاید بجز آوارگی

خود بخود طائر لپک کر زیر دام آ ہی گیا

جذبۂ الفت کی یہ تاثیر بھی کچھ کم نہیں

غیر کے خط میں ہمیں ان کا سلام آ ہی گیا

داد کے قابل تھا واعظ کا بیان حشر بھی

میں تو یہ سمجھا کوئی محشر خرام آ ہی گیا

داور محشر نے جب چھیڑا وفا کا تذکرہ

آ گیا ان کی زباں پر میرا نام آ ہی گیا

مجھ کو ساحرؔ دل نے بخشی طاقت صبر و سکوں

تھا تو یہ ناکام لیکن میرے کام آ ہی گیا