husn ko aaKHir KHayal-e-faiz-e-am aa hi gaya

husn ko āḳhir ḳhayāl-e-faiz-e-ām aa hī gayā

aaj koī ḳhud-baḳhud bālā-e-bām aa hī gayā

gardish-e-taqdīr āḳhir kaif-parvar ho ga.ī

mahfil-e-sāqī meñ mujh tak daur-e-jām aa hī gayā

husn kī har peshkash ab rā.egāñ jaane lagī

ishq ko āḳhir ḳhayāl-e-intiqām aa hī gayā

kuchh na thā parvāz meñ shāyad ba-juz āvārgī

ḳhud-baḳhud taa.ir lapak kar zer-e-dām aa hī gayā

jazba-e-ulfat kī ye tāsīr bhī kuchh kam nahīñ

ġhair ke ḳhat meñ hameñ un kā salām aa hī gayā

daad ke qābil thā vaa.iz kā bayān-e-hashr bhī

maiñ to ye samjhā koī mahshar-ḳhirām aa hī gayā

dāvar-e-mahshar ne jab chheḌā vafā kā tazkira

aa gayā un kī zabāñ par merā naam aa hī gayā

mujh ko 'sāhir' dil ne baḳhshī tāqat-e-sabr-o-sukūñ

thā to ye nākām lekin mere kaam aa hī gayā

husn ko aaKHir KHayal-e-faiz-e-am aa hi gaya

aaj koi KHud-baKHud baala-e-baam aa hi gaya

gardish-e-taqdir aaKHir kaif-parwar ho gai

mahfil-e-saqi mein mujh tak daur-e-jam aa hi gaya

husn ki har peshkash ab raegan jaane lagi

ishq ko aaKHir KHayal-e-intiqam aa hi gaya

kuchh na tha parwaz mein shayad ba-juz aawargi

KHud-baKHud tair lapak kar zer-e-dam aa hi gaya

jazba-e-ulfat ki ye tasir bhi kuchh kam nahin

ghair ke KHat mein hamein un ka salam aa hi gaya

dad ke qabil tha waiz ka bayan-e-hashr bhi

main to ye samjha koi mahshar-KHiram aa hi gaya

dawar-e-mahshar ne jab chheDa wafa ka tazkira

aa gaya un ki zaban par mera nam aa hi gaya

mujh ko 'sahir' dil ne baKHshi taqat-e-sabr-o-sukun

tha to ye nakaam lekin mere kaam aa hi gaya