husn ko ghair ki nazron se na parkha jae

husn ko ġhair kī nazroñ se na parkhā jaa.e

dekhne vaale kā me.aar bhī dekhā jaa.e

aao tajdīd-e-vafā ko hī bahāna kar leñ

munjamid dariyā meñ tūfān uThāyā jaa.e

baad muddat ke phir ehsās-e-tarab jaagā hai

phir se palkoñ ko sitāroñ se sajāyā jaa.e

imtihāñ zarf kā apne hī agar lenā hai

kal jo paayā thā chalo aaj vo khoyā jaa.e

husn ko ghair ki nazron se na parkha jae

dekhne wale ka mear bhi dekha jae

aao tajdid-e-wafa ko hi bahana kar len

munjamid dariya mein tufan uThaya jae

baad muddat ke phir ehsas-e-tarab jaga hai

phir se palkon ko sitaron se sajaya jae

imtihan zarf ka apne hi agar lena hai

kal jo paya tha chalo aaj wo khoya jae