husn ko samajhta hai ishq ham-zaban apna

husn ko samajhtā hai ishq ham-zabāñ apnā

hai haqīqat aisī hī yā hai ye gumāñ apnā

faash ham kareñ kyūñkar rāz-e-mudda.ā-yābī

gum husūl-e-maqsad meñ hāsil-e-bayāñ apnā

kārsāz hai kitnī dīd-o-bāz-dīd apnī

mil gayā sila ham ko ba.ad-e-imtihāñ apnā

lutf-e-ranjish-e-bejā aaj donoñ paate haiñ

muskurā rahe haiñ vo dil hai shādmāñ apnā

un kī dil-farebī kā ye javāb hai varna

mujh sā bad-gumāñ samjhe un ko mehrbāñ apnā

kārvāñ ke bhī milte kuchh nishāñ ye nā-mumkin

kuchh asar to chhoḌegī yād-e-kārvāñ apnā

dard-āshnā dil ko dekh kar maiñ kahtā huuñ

yaas de nahīñ saktī aas ko makāñ apnā

bekasī kī manzil se jis kī had nahīñ miltī

is zamīñ pe khīñcheñ ham kis tarah nishāñ apnā

kyā ilaaj hai 'manzūr' is junūñ-ḳhirāmī kā

munfa.il huuñ majnūñ ko kah ke ham-ināñ apnā

husn ko samajhta hai ishq ham-zaban apna

hai haqiqat aisi hi ya hai ye guman apna

fash hum karen kyunkar raaz-e-muddaa-yabi

gum husul-e-maqsad mein hasil-e-bayan apna

karsaz hai kitni did-o-baz-did apni

mil gaya sila hum ko baad-e-imtihan apna

lutf-e-ranjish-e-beja aaj donon pate hain

muskura rahe hain wo dil hai shadman apna

un ki dil-farebi ka ye jawab hai warna

mujh sa bad-guman samjhe un ko mehrban apna

karwan ke bhi milte kuchh nishan ye na-mumkin

kuchh asar to chhoDegi yaad-e-karwan apna

dard-ashna dil ko dekh kar main kahta hun

yas de nahin sakti aas ko makan apna

bekasi ki manzil se jis ki had nahin milti

is zamin pe khinchen hum kis tarah nishan apna

kya ilaj hai 'manzur' is junun-KHirami ka

munfail hun majnun ko kah ke ham-inan apna