husn ko wusaten jo din ishq ko hausla diya

husn ko vus.ateñ jo diiñ ishq ko hausla diyā

jo na mile na miT sake vo mujhe mudda.ā diyā

haath meñ le ke jām-e-mai aaj vo muskurā diyā

aql ko sard kar diyā ruuh ko jagmagā diyā

dil pe liyā hai dāġh-e-ishq kho ke bahār-e-zindagī

ik gul-e-tar ke vāste maiñ ne chaman luTā diyā

lazzat-e-dard-e-ḳhastagī daulat-e-dāman-tahī

toḌ ke saare hausle ab mujhe ye silā diyā

kuchh to kaho ye kyā huā tum bhī the saath saath kyā

ġham meñ ye kyuuñ surūr thā dard ne kyuuñ mazā diyā

ab na ye merī zaat hai ab na ye kā.enāt hai

maiñ ne navā-e-ishq ko saaz se yuuñ milā diyā

aks jamāl-e-yār kā ā.ina-e-ḳhudī meñ hai

ye ġham-e-hijr kyā diyā mujh se mujhe chhupā diyā

hashr meñ āftāb-e-hashr aur vo shor-e-al-amāñ

'asġhar'-e-but-parast ne zulf kā vāstā diyā

husn ko wusaten jo din ishq ko hausla diya

jo na mile na miT sake wo mujhe muddaa diya

hath mein le ke jam-e-mai aaj wo muskura diya

aql ko sard kar diya ruh ko jagmaga diya

dil pe liya hai dagh-e-ishq kho ke bahaar-e-zindagi

ek gul-e-tar ke waste main ne chaman luTa diya

lazzat-e-dard-e-KHastagi daulat-e-daman-tahi

toD ke sare hausle ab mujhe ye sila diya

kuchh to kaho ye kya hua tum bhi the sath sath kya

gham mein ye kyun surur tha dard ne kyun maza diya

ab na ye meri zat hai ab na ye kaenat hai

main ne nawa-e-ishq ko saz se yun mila diya

aks jamal-e-yar ka aaina-e-KHudi mein hai

ye gham-e-hijr kya diya mujh se mujhe chhupa diya

hashr mein aaftab-e-hashr aur wo shor-e-al-aman

'asghar'-e-but-parast ne zulf ka wasta diya