husn kya jis ko kisi husn se KHatra na hua

husn kyā jis ko kisī husn se ḳhatra na huā

kaun yūsuf hadaf-e-kaid-e-zulaiḳhā na huā

vo payambar bhī nahīñ hogā ḳhudā shāyad ho

paak dāman to rahā shahr meñ rusvā na huā

the nayā chāñd to thiiñ ham se umīdeñ kyā kyā

qaus ke qaus rahe dā.era puurā na huā

larzish-e-lab ko zabāñ koī kumak de na sakī

pūchhne par bhī to elān-e-tamannā na huā

ham girebān-e-shab-e-tār TaTolā hī kiye

kaaj tukmoñ se sile the so ujālā na huā

kyā na chāhā ki banā le mah-e-kan.āñ ko ġhulām

ek buḌhiyā ne bhī afsos ki paisa na huā

nā-sho.ūrī meñ ajab zo.am thā dānā.ī kā

jab zarā aql mujhe aa.ī to dīvāna huā

vārisoñ ko na rahā yaad ki virsa kyā thā

aur kafan bhī shohdā kā abhī mailā na huā

har tamannā ne nikalte hī daġhā dī kaisī

kuchh vafādār vo armāñ thā jo puurā na huā

pyaar be-qaul-o-qasam donoñ taraf ab tak hai

aa paḌī us ko hayā ham se taqāzā na huā

zinda gaaḌe hue bandoñ ke ye sunsān nagar

aaj hī koī zamāne kā masīhā na huā

ye bhī kahtā ki ḳhudā huuñ to jabīñ jhuk jaatī

vaisā insān koī aur to paidā na huā

kunj tak aa ke mujhe suniye ki bulbul koī

aa ke mahfil meñ kabhī zamzama-pairā na huā

husn kya jis ko kisi husn se KHatra na hua

kaun yusuf hadaf-e-kaid-e-zulaiKHa na hua

wo payambar bhi nahin hoga KHuda shayad ho

pak daman to raha shahr mein ruswa na hua

the naya chand to thin hum se umiden kya kya

qaus ke qaus rahe daera pura na hua

larzish-e-lab ko zaban koi kumak de na saki

puchhne par bhi to elan-e-tamanna na hua

hum gireban-e-shab-e-tar TaTola hi kiye

kaj tukmon se sile the so ujala na hua

kya na chaha ki bana le mah-e-kanan ko ghulam

ek buDhiya ne bhi afsos ki paisa na hua

na-shouri mein ajab zoam tha danai ka

jab zara aql mujhe aai to diwana hua

warison ko na raha yaad ki wirsa kya tha

aur kafan bhi shohda ka abhi maila na hua

har tamanna ne nikalte hi dagha di kaisi

kuchh wafadar wo arman tha jo pura na hua

pyar be-qaul-o-qasam donon taraf ab tak hai

aa paDi us ko haya hum se taqaza na hua

zinda gaDe hue bandon ke ye sunsan nagar

aaj hi koi zamane ka masiha na hua

ye bhi kahta ki KHuda hun to jabin jhuk jati

waisa insan koi aur to paida na hua

kunj tak aa ke mujhe suniye ki bulbul koi

aa ke mahfil mein kabhi zamzama-paira na hua