حسن میں شان کبریائی ہے

حسن میں شان کبریائی ہے

وہ جدھر ہے ادھر خدائی ہے

پی رہا ہوں نگاہ ساقی سے

میری رندی بھی پارسائی ہے

اب ترے در سے جا نہیں سکتا

یہ عطائے شکستہ پائی ہے

آشنا آشنا سے بیگانہ

کیا یہ دستور آشنائی ہے

راست گوئی ہے ایک جرم یہاں

ہائے کیسی تری خدائی ہے

کوئی منہ سے کہے کہے نہ کہے

سب ہیں اک ذوق خود نمائی ہے

تجھ کو پایا تو یہ ہوا محسوس

میری ہستی تری جدائی ہے

بھولتا ہی نہیں خیال ان کا

یہ عجب طرز دل ربائی ہے

دیر و کعبہ انہیں مبارک ہو

جن کی فطرت میں جبہ سائی ہے

رہ نما بن کے راہ بھول گئے

واہ کیا خوب رہنمائی ہے