husn mein shan-e-kibriyai hai

husn meñ shān-e-kibriyā.ī hai

vo jidhar hai udhar ḳhudā.ī hai

pī rahā huuñ nigāh-e-sāqī se

merī rindī bhī pārsā.ī hai

ab tire dar se jā nahīñ saktā

ye atā-e-shikasta-pā.ī hai

āshnā āshnā se begāna

kyā ye dastūr-e-āshnā.ī hai

rāst-goī hai ek jurm yahāñ

haa.e kaisī tirī ḳhudā.ī hai

koī muñh se kahe kahe na kahe

sab haiñ ik zauq-e-ḳhud-numā.ī hai

tujh ko paayā to ye huā mahsūs

merī hastī tirī judā.ī hai

bhūltā hī nahīñ ḳhayāl un kā

ye ajab tarz-e-dilrubā.ī hai

dair-o-ka.aba unheñ mubārak ho

jin kī fitrat meñ jib.ha-sā.ī hai

rahnumā ban ke raah bhuul ga.e

vaah kyā ḳhuub rahnumā.ī hai

husn mein shan-e-kibriyai hai

wo jidhar hai udhar KHudai hai

pi raha hun nigah-e-saqi se

meri rindi bhi parsai hai

ab tere dar se ja nahin sakta

ye ata-e-shikasta-pai hai

aashna aashna se begana

kya ye dastur-e-ashnai hai

rast-goi hai ek jurm yahan

hae kaisi teri KHudai hai

koi munh se kahe kahe na kahe

sab hain ek zauq-e-KHud-numai hai

tujh ko paya to ye hua mahsus

meri hasti teri judai hai

bhulta hi nahin KHayal un ka

ye ajab tarz-e-dilrubai hai

dair-o-kaba unhen mubarak ho

jin ki fitrat mein jibha-sai hai

rahnuma ban ke rah bhul gae

wah kya KHub rahnumai hai