husn muhtaj-e-KHatt-o-Khaal nahin

husn muhtāj-e-ḳhatt-o-ḳhāl nahīñ

ḳhud nazar darḳhur-e-jamāl nahīñ

furqat-o-vasl kā savāl nahīñ

be-dilī terā koī haal nahīñ

tujh ko kyā ho gayā hai ab ai dil

kyoñ kisī chiiz se savāl nahīñ

ābgīna nahīñ hai patthar hai

dil agar ġham se bāl-bāl nahīñ

ḳhūn-e-dil jaan kar maiñ piitā huuñ

jāntā huuñ ki mai halāl nahīñ

shauq kā naam bhī na lo hargiz

dil ke haq meñ ye nek-fāl nahīñ

kyā qayāmat hai vā'da-e-dīdār

sā'at-o-roz-o-māh-o-sāl nahīñ

naḳhl-e-ġham ko bhalī hai dil kī zamīñ

ki ḳhushī se koī nihāl nahīñ

shikva kaisā ki shukr bhī hai gila

saañs lene kī yaañ majāl nahīñ

ye ri’āyāt-e-lafz o josh-e-fuġhāñ

ġhāliban naqs hai kamāl nahīñ

gul-o-bulbul kī dekhte ho bahār

dil kā 'shabbīr' kuchh ḳhayāl nahīñ

husn muhtaj-e-KHatt-o-KHal nahin

KHud nazar darKHur-e-jamal nahin

furqat-o-wasl ka sawal nahin

be-dili tera koi haal nahin

tujh ko kya ho gaya hai ab ai dil

kyon kisi chiz se sawal nahin

aabgina nahin hai patthar hai

dil agar gham se baal-baal nahin

KHun-e-dil jaan kar main pita hun

jaanta hun ki mai halal nahin

shauq ka nam bhi na lo hargiz

dil ke haq mein ye nek-fal nahin

kya qayamat hai wa'da-e-didar

sa'at-o-roz-o-mah-o-sal nahin

naKHl-e-gham ko bhali hai dil ki zamin

ki KHushi se koi nihaal nahin

shikwa kaisa ki shukr bhi hai gila

sans lene ki yan majal nahin

ye ri’ayat-e-lafz o josh-e-fughan

ghaaliban naqs hai kamal nahin

gul-o-bulbul ki dekhte ho bahaar

dil ka 'shabbir' kuchh KHayal nahin