حسن محتاج خط و خال نہیں

حسن محتاج خط و خال نہیں

خود نظر درخور جمال نہیں

فرقت و وصل کا سوال نہیں

بے دلی تیرا کوئی حال نہیں

تجھ کو کیا ہو گیا ہے اب اے دل

کیوں کسی چیز سے سوال نہیں

آبگینہ نہیں ہے پتھر ہے

دل اگر غم سے بال بال نہیں

خون دل جان کر میں پیتا ہوں

جانتا ہوں کہ مے حلال نہیں

شوق کا نام بھی نہ لو ہرگز

دل کے حق میں یہ نیک فال نہیں

کیا قیامت ہے وعدۂ دیدار

ساعت و روز و ماہ و سال نہیں

نخل غم کو بھلی ہے دل کی زمیں

کہ خوشی سے کوئی نہال نہیں

شکوہ کیسا کہ شکر بھی ہے گلہ

سانس لینے کی یاں مجال نہیں

یہ رعایات لفظ و جوش فغاں

غالباً نقص ہے کمال نہیں

گل و بلبل کی دیکھتے ہو بہار

دل کا شبیرؔ کچھ خیال نہیں