husn-o-ishq ka sangam der tak nahin rahta

husn-o-ishq kā sañgam der tak nahīñ rahtā

koī bhī hasīñ mausam der tak nahīñ rahtā

lauT jaao raste se tum na.e musāfir ho

pyaar kā safar hamdam der tak nahīñ rahtā

ūñche ūñche mahloñ kī dāstāñ ye kahtī hai

qahqahoñ kā ye aalam der tak nahīñ rahtā

dil kisī kā TuuTe yā ghar kisī kā jal jaa.e

bevafā ke dil ko ġham der tak nahīñ rahtā

ho sake to chāhat kī choT se bache rahnā

varna zaḳhm par marham der tak nahīñ rahtā

kyoñ ġhurūr karte ho jā ke tum bulandī par

shohratoñ kā ye parcham der tak nahīñ rahtā

kaun jaane kab kis par zindagī Thahar jaa.e

koī rustam-e-āzam der tak nahīñ rahtā

husn-o-ishq ka sangam der tak nahin rahta

koi bhi hasin mausam der tak nahin rahta

lauT jao raste se tum nae musafir ho

pyar ka safar hamdam der tak nahin rahta

unche unche mahlon ki dastan ye kahti hai

qahqahon ka ye aalam der tak nahin rahta

dil kisi ka TuTe ya ghar kisi ka jal jae

bewafa ke dil ko gham der tak nahin rahta

ho sake to chahat ki choT se bache rahna

warna zaKHm par marham der tak nahin rahta

kyon ghurur karte ho ja ke tum bulandi par

shohraton ka ye parcham der tak nahin rahta

kaun jaane kab kis par zindagi Thahar jae

koi rustam-e-azam der tak nahin rahta