husn-o-ulfat sath hain aaghaz se anjam tak

husn-o-ulfat saath haiñ āġhāz se anjām tak

merā afsāna sunā jā.egā tere naam tak

zindagī kī talḳhiyāñ haiñ gardish-e-ayyām tak

lāla-o-gul kā tabassum hai chaman meñ shaam tak

kyā ḳhabar parda-ba-parda kitne jalve haiñ nihāñ

chashm-e-zāhir-bīñ ne dekhā un ko husn-e-ām tak

jin ke paimāne bhare haiñ un pe kyā terā karam

lutf to saaqī hai jab bhar jaa.eñ ḳhālī jaam tak

jis ne jiine kā irāda kar liyā vo jī gayā

us se katrā kar chalī hai gardish-e-ayyām tak

ban ga.e shaiḳh-o-barahman mālik-e-dair-o-haram

faiz-e-mai-ḳhāna magar jaarī hai ḳhās-o-ām tak

saañs lenā to nahīñ koī dalīl-e-zindagī

zindagī kaisī nahīñ ab zindagī kā naam tak

husn kī pahlī nazar hī dil kī duniyā kho ga.ī

luT ga.e āġhāz meñ dekhā nahīñ anjām tak

ab to saaqī azmat-e-mai-ḳhāna tere haath hai

gardish-e-ayyām aa pahuñchī hai daur-e-jām tak

mai-kada kā haal kuchh ho chashm-e-sāqī kuchh kahe

hai surāhī tak nazar 'ārif' kisī kī jaam tak

husn-o-ulfat sath hain aaghaz se anjam tak

mera afsana suna jaega tere nam tak

zindagi ki talKHiyan hain gardish-e-ayyam tak

lala-o-gul ka tabassum hai chaman mein sham tak

kya KHabar parda-ba-parda kitne jalwe hain nihan

chashm-e-zahir-bin ne dekha un ko husn-e-am tak

jin ke paimane bhare hain un pe kya tera karam

lutf to saqi hai jab bhar jaen KHali jam tak

jis ne jine ka irada kar liya wo ji gaya

us se katra kar chali hai gardish-e-ayyam tak

ban gae shaiKH-o-barahman malik-e-dair-o-haram

faiz-e-mai-KHana magar jari hai KHas-o-am tak

sans lena to nahin koi dalil-e-zindagi

zindagi kaisi nahin ab zindagi ka nam tak

husn ki pahli nazar hi dil ki duniya kho gai

luT gae aaghaz mein dekha nahin anjam tak

ab to saqi azmat-e-mai-KHana tere hath hai

gardish-e-ayyam aa pahunchi hai daur-e-jam tak

mai-kada ka haal kuchh ho chashm-e-saqi kuchh kahe

hai surahi tak nazar 'arif' kisi ki jam tak