husn paband-e-jafa ho jaise

husn pāband-e-jafā ho jaise

ye koī ḳhaas adā ho jaise

yuuñ tirī yaad hai mere dil meñ

kisī marghaT meñ diyā ho jaise

ho gayā suukh ke kāñTā har phuul

ye mahakne kī sazā ho jaise

merī furqat kā ġham-āgīñ 'ālam

chhup ke tū dekh rahā ho jaise

kashtiyāñ ġharq huī jaatī haiñ

nāḳhudā ho na ḳhudā ho jaise

allah allah tirā andāz-e-ḳhirām

har qadam mauj-e-sabā ho jaise

kitnī pur-kaif hai ye zulmat-e-shab

terī zulfoñ kī ghaTā ho jaise

tere hoñToñ pe tabassum tauba

māh-o-anjum kī ziyā ho jaise

un se kartā huuñ taġhāful kā gila

'ishq meñ ye bhī ravā ho jaise

is tarah 'ishq se dil-shād haiñ ham

yahī har ġham kī davā ho jaise

us se aatī nahīñ ab koī sadā

sāz-e-dil TuuT gayā ho jaise

dekh kar tujh ko ye hotā hai gumāñ

tū mire dukh kī davā ho jaise

un ko yuuñ DhūñD rahā huuñ 'parvez'

'ishq se husn judā ho jaise

husn paband-e-jafa ho jaise

ye koi KHas ada ho jaise

yun teri yaad hai mere dil mein

kisi marghaT mein diya ho jaise

ho gaya sukh ke kanTa har phul

ye mahakne ki saza ho jaise

meri furqat ka gham-agin 'alam

chhup ke tu dekh raha ho jaise

kashtiyan gharq hui jati hain

naKHuda ho na KHuda ho jaise

allah allah tera andaz-e-KHiram

har qadam mauj-e-saba ho jaise

kitni pur-kaif hai ye zulmat-e-shab

teri zulfon ki ghaTa ho jaise

tere honTon pe tabassum tauba

mah-o-anjum ki ziya ho jaise

un se karta hun taghaful ka gila

'ishq mein ye bhi rawa ho jaise

is tarah 'ishq se dil-shad hain hum

yahi har gham ki dawa ho jaise

us se aati nahin ab koi sada

saz-e-dil TuT gaya ho jaise

dekh kar tujh ko ye hota hai guman

tu mere dukh ki dawa ho jaise

un ko yun DhunD raha hun 'parwez'

'ishq se husn juda ho jaise