husn par firaun ki phabti kahi

husn par fir.aun kī phabtī kahī

haath laanā yaar kyuuñ kaisī kahī

dāman-e-yūsuf hī bhaḌkātā rahā

ishq aur tark-e-adab achchhī kahī

kaun samjhā.e ki duniyā gol hai

aap ne jaisī sunī vaisī kahī

koī zid thī yā samajh kā pher thā

man ga.e vo maiñ ne jab ulTī kahī

dard se pahle karūñ fikr-e-davā

vaah ye achchhī ulTavānsī kahī

dost se parda kiyā ye kyā kiyā

āp-bītī chhoḌ jag-bītī kahī

shak hai kāfir ko mire īmān meñ

jaise maiñ ne koī muñh dekhī kahī

kyā ḳhabar thī ye judā.ī aur hai

haa.e maiñ ne kyuuñ ḳhudā-lagtī kahī

muft meñ sun lī 'yagānā' kī ġhazal

an-sunī kar dī jo matlab kī kahī

husn par firaun ki phabti kahi

hath lana yar kyun kaisi kahi

daman-e-yusuf hi bhaDkata raha

ishq aur tark-e-adab achchhi kahi

kaun samjhae ki duniya gol hai

aap ne jaisi suni waisi kahi

koi zid thi ya samajh ka pher tha

man gae wo main ne jab ulTi kahi

dard se pahle karun fikr-e-dawa

wah ye achchhi ulTawansi kahi

dost se parda kiya ye kya kiya

aap-biti chhoD jag-biti kahi

shak hai kafir ko mere iman mein

jaise main ne koi munh dekhi kahi

kya KHabar thi ye judai aur hai

hae main ne kyun KHuda-lagti kahi

muft mein sun li 'yagana' ki ghazal

an-suni kar di jo matlab ki kahi