husn parde mein sahi zauq-e-taqaza bhi to ho

husn parde meñ sahī zauq-e-taqāzā bhī to ho

chashm-e-dil se koī mushtāq-e-tamāshā bhī to ho

ḳhalvat-e-nāz meñ ārā.ish-e-gesū kab tak

husn-e-rangīñ kī qasam anjuman-ārā bhī to ho

dard-e-dil kis se kahūñ zaḳhm-e-jigar kis ko dikhā.ūñ

chārāgar ban ke koī pūchhne vaalā bhī to ho

kaun kahtā hai ki āsāñ nahīñ milnā terā

sar meñ saudā bhī to ho dil meñ tamanna bhī to ho

bāda-e-vasl mayassar ho to kyūñkar ho mujhe

talḳhī-e-zahr-e-sitam pahle gavārā bhī to ho

jān-e-shīrīñ tire qadmoñ pe nichhāvar kar duuñ

gosha-e-abrū-e-pur-ḳham kā ishārā bhī to ho

zarra zarra haram-e-jalva-e-sarmad hai 'valī'

chashm-e-bātin se koī mahv-e-nazāra bhī to ho

husn parde mein sahi zauq-e-taqaza bhi to ho

chashm-e-dil se koi mushtaq-e-tamasha bhi to ho

KHalwat-e-naz mein aaraish-e-gesu kab tak

husn-e-rangin ki qasam anjuman-ara bhi to ho

dard-e-dil kis se kahun zaKHm-e-jigar kis ko dikhaun

chaaragar ban ke koi puchhne wala bhi to ho

kaun kahta hai ki aasan nahin milna tera

sar mein sauda bhi to ho dil mein tamanna bhi to ho

baada-e-wasl mayassar ho to kyunkar ho mujhe

talKHi-e-zahr-e-sitam pahle gawara bhi to ho

jaan-e-shirin tere qadmon pe nichhawar kar dun

gosha-e-abru-e-pur-KHam ka ishaara bhi to ho

zarra zarra haram-e-jalwa-e-sarmad hai 'wali'

chashm-e-baatin se koi mahw-e-nazara bhi to ho