husn se sharh hui ishq ke afsane ki

husn se sharh huī ishq ke afsāne kī

sham.a lau de ke zabāñ ban ga.ī parvāne kī

shaan bastī se nahīñ kam mire vīrāne kī

ruuh har boñDle meñ hai kisī dīvāne kī

āmad-e-mausam-e-gul kī hai ḳhabar daur-e-digar

tāzgī chāhiye kuchh sāḳht meñ paimāne kī

aa.ī hai kaaT ke mī.ād-e-asīrī kī bahār

hatkaḌī khul ke girī jaatī hai dīvāne kī

sard ai sham.a na ho garmi-e-bāzār-e-jamāl

phūñk de ruuh na.ī laash meñ parvāne kī

uTh khaḌā ho to bagūlā hai jo baiThe to ġhubār

ḳhaak ho kar bhī vahī shaan hai dīvāne kī

'ārzū' ḳhatm haqīqat pe huā daur-e-majāz

Daalī ka.abe kī binā aaḌ se but-ḳhāne kī

husn se sharh hui ishq ke afsane ki

shama lau de ke zaban ban gai parwane ki

shan basti se nahin kam mere virane ki

ruh har bonDle mein hai kisi diwane ki

aamad-e-mausam-e-gul ki hai KHabar daur-e-digar

tazgi chahiye kuchh saKHt mein paimane ki

aai hai kaT ke miad-e-asiri ki bahaar

hatkaDi khul ke giri jati hai diwane ki

sard ai shama na ho garmi-e-bazar-e-jamal

phunk de ruh nai lash mein parwane ki

uTh khaDa ho to bagula hai jo baiThe to ghubar

KHak ho kar bhi wahi shan hai diwane ki

'arzu' KHatm haqiqat pe hua daur-e-majaz

Dali kabe ki bina aaD se but-KHane ki