husul-e-arzu mein sai-e-imkani to hoti hai

husūl-e-ārzū meñ sa.ī-e-imkānī to hotī hai

pareshānī se kyā Darnā pareshānī to hotī hai

koī ghabrā ke apnī jaan hī de de to kyā kahiye

har ik mushkil se paidā varna āsānī to hotī hai

bahāroñ se ta.alluq aarzī apnā sahī lekin

hamāre ghar kī raunaq ab bhī vīrānī to hotī hai

mizāj-e-husn par kyā zor ahl-e-ishq kā varna

jab un kā zikr aatā hai pashemānī to hotī hai

kahīñ miltā hai un ko soz mere ashk-e-rangīñ kā

mah-o-anjum meñ yuuñ hone ko tābānī to hotī hai

zamānat āsmāñ kī kaun de arbāb-e-gulshan ko

ye maanā lāla-o-gul kī nigahbānī to hotī hai

tumhāre saath thiiñ kuchh aur zālim chāñdnī rāteñ

fazā meñ aaj bhī ik kaif-sāmānī to hotī hai

tarīq-e-dil-navāzī bhī huā kartā hai logoñ meñ

jafā-kārī to karte ho sitam-rānī to hotī hai

'adīb' aisī navā jis se diloñ ko zindagī miltī

ġhazal-ḳhvānī kā kyā kahnā ġhazal-ḳhvānī to hotī he

husul-e-arzu mein sai-e-imkani to hoti hai

pareshani se kya Darna pareshani to hoti hai

koi ghabra ke apni jaan hi de de to kya kahiye

har ek mushkil se paida warna aasani to hoti hai

bahaaron se talluq aarzi apna sahi lekin

hamare ghar ki raunaq ab bhi virani to hoti hai

mizaj-e-husn par kya zor ahl-e-ishq ka warna

jab un ka zikr aata hai pashemani to hoti hai

kahin milta hai un ko soz mere ashk-e-rangin ka

mah-o-anjum mein yun hone ko tabani to hoti hai

zamanat aasman ki kaun de arbab-e-gulshan ko

ye mana lala-o-gul ki nigahbani to hoti hai

tumhaare sath thin kuchh aur zalim chandni raaten

faza mein aaj bhi ek kaif-samani to hoti hai

tariq-e-dil-nawazi bhi hua karta hai logon mein

jafa-kari to karte ho sitam-rani to hoti hai

'adib' aisi nawa jis se dilon ko zindagi milti

ghazal-KHwani ka kya kahna ghazal-KHwani to hoti he