حصول بندگی زاہد اگر داغ جبیں تک ہے

حصول بندگی زاہد اگر داغ جبیں تک ہے

یہ تیری خود فریبی خود ترے حد یقیں تک ہے

کسی کا حسن خود رسوا ہوا ہے دونوں عالم میں

ہمارے عشق کی دنیا جہاں ہم ہیں وہیں تک ہے

عتاب آلودہ نظروں سے مجھے او دیکھنے والے

یہ میری زندگی تیری نگاہ واپسیں تک ہے

تصور بھی اسی کا یاد اس کی ہے خیال اس کا

کہ اس پہ دل ہی کیا قرباں مری جان حزیں تک ہے

اثرؔ اک دن سناؤں گا اسی کو حال دل اپنا

رسائی میری کعبہ تک نہیں کعبہ نشیں تک ہے