husul-e-zar na kasb-e-rutba-e-zi-shan pe rakkhi hai

husūl-e-zar na kasb-e-rutba-e-zī-shāñ pe rakkhī hai

nazar ham ne hamesha ḳhidmat-e-insāñ pe rakkhī hai

usī ko har tarah kī kāmrānī ho ga.ī hāsil

asās-e-zīst jis ne hikmat-e-qurāñ pe rakkhī hai

azal ke roz hī se jins-e-ulfat kī girāñ-bārī

nahīf-o-nā-tavāñ se shāna-e-insāñ pe rakkhī hai

mohabbat pyaar hasrat ranj-o-ġham dard-o-hirāsānī

sabhī bātoñ kī tohmat ik dil-e-nādāñ pe rakkhī hai

tan-āsānī-e-sāhil ko to kuchh kahtā nahīñ koī

har ik ne tohmat-e-fitnagarī tūfāñ pe rakkhī hai

ye gul hai barq hai sho'la hai kundan hai ki hai laala

na jaane kyā dahaktī shai lab-e-jānāñ pe rakkhī hai

mah-o-ḳhurshīd ho jaa.eñ na maare sharm ke paanī

isī ḳhātir naqāb us ne ruḳh-e-tābāñ pe rakkhī hai

'nadīm' us ko mayassar aa ga.ī hai shohrat-e-jāved

sadā añgusht jis ne gardish-e-daurāñ pe rakkhī hai

husul-e-zar na kasb-e-rutba-e-zi-shan pe rakkhi hai

nazar hum ne hamesha KHidmat-e-insan pe rakkhi hai

usi ko har tarah ki kaamrani ho gai hasil

asas-e-zist jis ne hikmat-e-quran pe rakkhi hai

azal ke roz hi se jins-e-ulfat ki giran-bari

nahif-o-na-tawan se shana-e-insan pe rakkhi hai

mohabbat pyar hasrat ranj-o-gham dard-o-hirasani

sabhi baaton ki tohmat ek dil-e-nadan pe rakkhi hai

tan-asani-e-sahil ko to kuchh kahta nahin koi

har ek ne tohmat-e-fitnagari tufan pe rakkhi hai

ye gul hai barq hai sho'la hai kundan hai ki hai lala

na jaane kya dahakti shai lab-e-jaanan pe rakkhi hai

mah-o-KHurshid ho jaen na mare sharm ke pani

isi KHatir naqab us ne ruKH-e-taban pe rakkhi hai

'nadim' us ko mayassar aa gai hai shohrat-e-jawed

sada angusht jis ne gardish-e-dauran pe rakkhi hai