huk uThti hai mere qalb ki gahrai mein

huuk uThtī hai mire qalb kī gahrā.ī meñ

us kī yaad aatī hai jab raat kī tanhā.ī meñ

ab to do vaqt kī roTī bhī nahīñ miltī hai

zindagī kaise kaTegī mirī mahñgā.ī meñ

aaj aayā vo mire ghar to ye mahsūs huā

māhtāb utrā ho jaise mirī añgnā.ī meñ

merī āñkhoñ se nikal aa.e ḳhushī ke aañsū

beTī ruḳhsat jo huī gūñjtī shahnā.ī meñ

ghar meñ mehmāñ agar aa.eñ to ḳhushī hotī hai

maiñ kasar kuchh nahīñ rakhtā huuñ pazīrā.ī meñ

na to roTī hī mayassar hai na kapḌā na makāñ

zindagī yuuñ bhī guzar jaatī hai kaThinā.ī meñ

husn aisā hai ki ā.īne ko hairāñ kar de

ik vafā kī hī kamī hai mire harjā.ī meñ

kaise ash.ār meñ lā.egā ġhazal kī ḳhushbū

vo jo masrūf hai bas qāfiya paimā.ī meñ

dāḳhila merā hī mamnūa hai gulshan meñ 'zakī'

jab ki ḳhuuñ maiñ ne diyā baaġh kī zebā.ī meñ

ai 'zakī' maiñ ne bhī ye ḳhvāh nahīñ samjhā thā

un kī sāzish rahī shāmil mirī paspā.ī meñ

huk uThti hai mere qalb ki gahrai mein

us ki yaad aati hai jab raat ki tanhai mein

ab to do waqt ki roTi bhi nahin milti hai

zindagi kaise kaTegi meri mahngai mein

aaj aaya wo mere ghar to ye mahsus hua

mahtab utra ho jaise meri angnai mein

meri aankhon se nikal aae KHushi ke aansu

beTi ruKHsat jo hui gunjti shahnai mein

ghar mein mehman agar aaen to KHushi hoti hai

main kasar kuchh nahin rakhta hun pazirai mein

na to roTi hi mayassar hai na kapDa na makan

zindagi yun bhi guzar jati hai kaThinai mein

husn aisa hai ki aaine ko hairan kar de

ek wafa ki hi kami hai mere harjai mein

kaise ashaar mein laega ghazal ki KHushbu

wo jo masruf hai bas qafiya paimai mein

daKHila mera hi mamnua hai gulshan mein 'zaki'

jab ki KHun main ne diya bagh ki zebai mein

ai 'zaki' main ne bhi ye KHwah nahin samjha tha

un ki sazish rahi shamil meri paspai mein