hun azal se muntazir baiTha hua

huuñ azal se muntazir baiThā huā

ik qayāmat aap kā va.ada huā

vo to ilzām-e-jafā se bach ga.e

ishq merā muft meñ rusvā huā

saare tūfāñ mauj ban kar rah ga.e

ashk-e-ġham qatre se jab dariyā huā

jab miTe armān-o-hasrat saiñkaḌoñ

dard dil meñ tab kahīñ paidā huā

baat jo nazroñ ne nazroñ se kahī

duur tak us baat kā charchā huā

un ko dekhā thā bas itnā yaad hai

be-ḳhudī meñ jaane phir kyā kyā huā

aap ke dāman talak pahuñche na aañch

sho.ala-e-ġham dil meñ hai bhaḌkā huā

ek tere rūThne se hai ye haal

jaise ho saarā jahāñ rūThā huā

ālam-e-josh-e-junūñ meñ bārhā

mujh ko ḳhud par aap kā dhokā huā

maiñ to ḳhud armānoñ se bezār thā

tum ne bhī Thukrā diyā to kyā huā

maiñ idhar ġharq-e-nadāmat aur udhar

bahr-e-rahmat josh meñ aaya huā

terī is baḳhshish ko yā-rab kyā kahūñ

dil diyā bhī mujh ko to TuuTā huā

hai tasavvur meñ bhī aane se hijāb

ik qayāmat aap kā pardā huā

sher merā sehr hai 'sāhir' huuñ maiñ

sar se pā tak dard meñ Duubā huā

hun azal se muntazir baiTha hua

ek qayamat aap ka wada hua

wo to ilzam-e-jafa se bach gae

ishq mera muft mein ruswa hua

sare tufan mauj ban kar rah gae

ashk-e-gham qatre se jab dariya hua

jab miTe arman-o-hasrat sainkaDon

dard dil mein tab kahin paida hua

baat jo nazron ne nazron se kahi

dur tak us baat ka charcha hua

un ko dekha tha bas itna yaad hai

be-KHudi mein jaane phir kya kya hua

aap ke daman talak pahunche na aanch

shoala-e-gham dil mein hai bhaDka hua

ek tere ruThne se hai ye haal

jaise ho sara jahan ruTha hua

aalam-e-josh-e-junun mein barha

mujh ko KHud par aap ka dhoka hua

main to KHud armanon se bezar tha

tum ne bhi Thukra diya to kya hua

main idhar gharq-e-nadamat aur udhar

bahr-e-rahmat josh mein aaya hua

teri is baKHshish ko ya-rab kya kahun

dil diya bhi mujh ko to TuTa hua

hai tasawwur mein bhi aane se hijab

ek qayamat aap ka parda hua

sher mera sehr hai 'sahir' hun main

sar se pa tak dard mein Duba hua