hun kis maqam pe dil mein tere KHabar na lage

huuñ kis maqām pe dil meñ tire ḳhabar na lage

tire salīqa-e-guftār ko nazar na lage

ghirā huā thā tū kuchh nāgavār logoñ meñ

malāl ye hai ki us vaqt ham ko par na lage

asīr-e-qarya-e-vahshat huuñ ek muddat se

ḳhirad kī raah kisī taur mo'tabar na lage

makāñ vahī hai par us kā makīn kyā uTThā

sahar bhī ho to vo pahlī sī ab sahar na lage

akelī shaam khaḌī thī udaas jañgal meñ

tuyūr bā-ḳhabar o āshnā-shajar na lage

sazā-e-jazba o ehsās-e-jāñ ke saath rahī

vo rog rog hī kyā hai jo umr bhar na lage

bajā hai ḳhvāb-navardī pa ḳhvāb aaise hoñ

khule jo aañkh to apnā hī ghar khañDar na lage

jo bā-kamāloñ kī tauqīr kam kare 'shāhid'

hamāre haath koī aisā bhī hunar na lage

hun kis maqam pe dil mein tere KHabar na lage

tere saliqa-e-guftar ko nazar na lage

ghira hua tha tu kuchh nagawar logon mein

malal ye hai ki us waqt hum ko par na lage

asir-e-qarya-e-wahshat hun ek muddat se

KHirad ki rah kisi taur mo'tabar na lage

makan wahi hai par us ka makin kya uTTha

sahar bhi ho to wo pahli si ab sahar na lage

akeli sham khaDi thi udas jangal mein

tuyur ba-KHabar o aashna-shajar na lage

saza-e-jazba o ehsas-e-jaan ke sath rahi

wo rog rog hi kya hai jo umr bhar na lage

baja hai KHwab-nawardi pa KHwab aaise hon

khule jo aankh to apna hi ghar khanDar na lage

jo ba-kamalon ki tauqir kam kare 'shahid'

hamare hath koi aisa bhi hunar na lage