hun shaiKH mushafi ka main hairan-e-shaeri

huuñ shaiḳh mus.hafī kā maiñ hairān-e-shā.erī

allāh muflisī meñ ye kuchh shān-e-shā.erī

rauñdā use tamām mire raḳhsh-e-kilk ne

saudā se bach rahā thā jo maidān-e-shā.erī

maiñ aur le ke sauda namak us meñ bhar diyā

thā us kā kam namak jo namakdān-e-shā.erī

hindostāñ ke gardan-e-ḳhurd-o-buzurg par

hai sach to ye mirā hī hai ehsān-e-shā.erī

pairav haiñ merī tarz ke yaañ chhoTe aur baḌe

mulk-e-suḳhan kā huuñ maiñ sulaimān-e-shā.erī

rahte haiñ īñchā-tānī meñ ab us ke aur yaar

thā haath meñ mire jo garebān-e-shā.erī

rakhtī hai nok-e-ḳhāma-e-jādū-raqam hanūz

mizhgān-e-tar se taaza gulistān-e-shā.erī

mūñdī jo aañkh maiñ ne to chashm-e-zamāna se

chhup jā.egā vūñhī mah-e-tābān-e-shā.erī

maiñ ibtadā-e-umr meñ muddat talak bahut

chhānā hai fārsī kā safāhān-e-shā.erī

ba.ad is ke reḳhte kī bhī rakkhī hai vo binā

hairāñ haiñ jis ke naqsh-e-tarāzān-e-shā.erī

kuchh kuchh kahe haiñ phir arabī meñ jo sher-o-nazm

is meñ bhī ban gayā huuñ maiñ sahbān-e-shā.erī

din raat mere nāḳhun-e-nok-e-qalam meñ haiñ

lākhoñ tarīq o sheva o unvān-e-shā.erī

har sifla kā dahan ye nahīñ hai ki ho sake

mere sivā.e sham-e-shabistān-e-shā.erī

jis roz mere jism se niklegī merī jaañ

ye jāniyo tū aaj ga.ī jān-e-shā.erī

lākhoñ tarāna-sanj hue is ke reza-chīñ

ai 'mus.hafī' mirā hī hai vo ḳhvān-e-shā.erī

hun shaiKH mushafi ka main hairan-e-shaeri

allah muflisi mein ye kuchh shan-e-shaeri

raunda use tamam mere raKHsh-e-kilk ne

sauda se bach raha tha jo maidan-e-shaeri

main aur le ke sauda namak us mein bhar diya

tha us ka kam namak jo namakdan-e-shaeri

hindostan ke gardan-e-KHurd-o-buzurg par

hai sach to ye mera hi hai ehsan-e-shaeri

pairaw hain meri tarz ke yan chhoTe aur baDe

mulk-e-suKHan ka hun main sulaiman-e-shaeri

rahte hain incha-tani mein ab us ke aur yar

tha hath mein mere jo gareban-e-shaeri

rakhti hai nok-e-KHama-e-jadu-raqam hanuz

mizhgan-e-tar se taza gulistan-e-shaeri

mundi jo aankh main ne to chashm-e-zamana se

chhup jaega wunhi mah-e-taban-e-shaeri

main ibtada-e-umr mein muddat talak bahut

chhana hai farsi ka safahan-e-shaeri

baad is ke reKHte ki bhi rakkhi hai wo bina

hairan hain jis ke naqsh-e-taraazan-e-shaeri

kuchh kuchh kahe hain phir arabi mein jo sher-o-nazm

is mein bhi ban gaya hun main sahban-e-shaeri

din raat mere naKHun-e-nok-e-qalam mein hain

lakhon tariq o shewa o unwan-e-shaeri

har sifla ka dahan ye nahin hai ki ho sake

mere siwae sham-e-shabistan-e-shaeri

jis roz mere jism se niklegi meri jaan

ye jaaniyo tu aaj gai jaan-e-shaeri

lakhon tarana-sanj hue is ke reza-chin

ai 'mushafi' mera hi hai wo KHwan-e-shaeri