hun wo momin jise iman se sarokar nahin

huuñ vo momin jise īmāñ se sarokār nahīñ

vo barahman huuñ jise hājat-e-zunnār nahīñ

gang vo kaan jo vaqf-e-suḳhan-e-yār nahīñ

kor vo aañkh jise hasrat-e-dīdār nahīñ

kufr se kaam na īmān se matlab hai hameñ

donoñ aalam se ba-juz tere sarokār nahīñ

kyā ḳhabar-dār karegā tū hameñ o zāhid

aap tū apnī haqīqat se ḳhabar-dār nahīñ

kab tire jalva-e-dīdār ne hairān kiyā

kaun sā din hai ki ham naqsh-ba-dīvār nahīñ

sarfaroshī sifat-e-kohkan āḳhir meñ hai

ishq pahle to bahut sahl hai dushvār nahīñ

dahan-e-gor se aatī hai sadā mayyat ko

aaj hamdam nahīñ terā koī ġham-ḳhvār nahīñ

dekh kar us ko ye hoñ mahv ba-rang-e-tasvīr

hai zabāñ muñh meñ magar tāqat-e-guftār nahīñ

chashm-e-dil khol agar hai talab-e-dīd 'akbar'

nazar aa.egā in āñkhoñ se vo dīdār nahīñ

hun wo momin jise iman se sarokar nahin

wo barahman hun jise hajat-e-zunnar nahin

gang wo kan jo waqf-e-suKHan-e-yar nahin

kor wo aankh jise hasrat-e-didar nahin

kufr se kaam na iman se matlab hai hamein

donon aalam se ba-juz tere sarokar nahin

kya KHabar-dar karega tu hamein o zahid

aap tu apni haqiqat se KHabar-dar nahin

kab tere jalwa-e-didar ne hairan kiya

kaun sa din hai ki hum naqsh-ba-diwar nahin

sarfaroshi sifat-e-kohkan aaKHir mein hai

ishq pahle to bahut sahl hai dushwar nahin

dahan-e-gor se aati hai sada mayyat ko

aaj hamdam nahin tera koi gham-KHwar nahin

dekh kar us ko ye hon mahw ba-rang-e-taswir

hai zaban munh mein magar taqat-e-guftar nahin

chashm-e-dil khol agar hai talab-e-did 'akbar'

nazar aaega in aankhon se wo didar nahin