hur pariyon ke jamal angar pe aane lage

huur pariyoñ ke jamāl angār pe aane lage

jab mire mahbūb kuchh singār pe aane lage

giile giile ho rahe the hoñT mere daf.atan

jab pasīne yaar ke ruḳhsār pe aane lage

phir mire sar qatl kā ilzām aane vaalā hai

phir se kuchh dāġh-e-lahū talvār pe aane lage

mere sar ke baal kī qīmat jo de sakte nahīñ

vo bhī merī qīmat-e-dastār pe aane lage

ġharq rahnā thā jinheñ gumnāmiyoñ ke bahr meñ

vo bhī dekho surḳhi-e-aḳhbār pe aane lage

thī jinheñ inkār-e-ulfat aur nafrat ishq se

kyoñ na jaane vo bhī rāh-e-pyār pe aane lage

maiñ ne me.ār-e-ġhazal jin ko batāyā thā kabhī

merī ġhazloñ ke vahī me.aar pe aane lage

dushmanoñ kī ruuh bhī 'tasnīm' thar thar kaañp uThī

jab hamāre naujavāñ yalġhār pe aane lage

hur pariyon ke jamal angar pe aane lage

jab mere mahbub kuchh singar pe aane lage

gile gile ho rahe the honT mere dafatan

jab pasine yar ke ruKHsar pe aane lage

phir mere sar qatl ka ilzam aane wala hai

phir se kuchh dagh-e-lahu talwar pe aane lage

mere sar ke baal ki qimat jo de sakte nahin

wo bhi meri qimat-e-dastar pe aane lage

gharq rahna tha jinhen gumnamiyon ke bahr mein

wo bhi dekho surKHi-e-aKHbar pe aane lage

thi jinhen inkar-e-ulfat aur nafrat ishq se

kyon na jaane wo bhi rah-e-pyar pe aane lage

main ne mear-e-ghazal jin ko bataya tha kabhi

meri ghazlon ke wahi mear pe aane lage

dushmanon ki ruh bhi 'tasnim' thar thar kanp uThi

jab hamare naujawan yalghaar pe aane lage