huzur-e-dawar-e-mahshar qayamat-KHez saman tha

huzūr-e-dāvar-e-mahshar qayāmat-ḳhez sāmāñ thā

hazāroñ haath the aur ek qātil kā girebāñ thā

jo ham donoñ kī qismat meñ pareshānī kā sāmāñ thā

mire dil se ziyāda yaar kā gesū pareshāñ thā

bhalā jannat meñ zer-e-sāya-e-tūbā vo kyā jaate

shahīdoñ ko tirī dīvār ke saaye kā armāñ thā

khile the fasl-e-gul meñ phuul yuuñ shāḳh-e-nasheman meñ

gulistāñ meñ nasheman thā nasheman meñ gulistāñ thā

sar-e-bālīñ na aanā thā na aa.e chārasāzī ko

hamāre dard-e-dil kā to unhīñ ke paas darmāñ thā

junūñ kā josh duunā ho gayā fasl-e-bahārī meñ

mirī qismat pe kyā kyā ḳhanda-zan chāk-e-garebāñ thā

nishān-e-zulm-e-zālim sirf mazlūmoñ se miltā thā

asīrān-e-sitam kī zaat se ābād zindāñ thā

zamāna jis pe shaidā thā usī par ham bhī shaidā the

usī par ham bhī qurbāñ the zamāna jis pe qurbāñ thā

jab un se pūchhtā huuñ kaun thā iqrār thā jis se

vo kahte haiñ hamīñ haiñ haañ hamīñ se ahd-o-paimāñ thā

na shāhān-e-salaf haiñ aur na un kī saltanat baaqī

kahāñ mulk-e-sulaimāñ thā kahāñ qasr-e-sulaimāñ thā

ajab andāz se bikhrī huī thī zulf aariz par

vo zālim kis pareshāñ-hāl ke ġham meñ pareshāñ thā

dil-e-barbād apnā banda-e-ishq-e-butāñ Thahrā

musalmāñ jis ko samjhe the vo kāfir nā-musalmāñ thā

hamārī laash par kis naaz se kahte haiñ vo hañs kar

nahīñ ma.alūm kyā 'naushād' tere dil meñ armāñ thā

huzur-e-dawar-e-mahshar qayamat-KHez saman tha

hazaron hath the aur ek qatil ka gireban tha

jo hum donon ki qismat mein pareshani ka saman tha

mere dil se ziyaada yar ka gesu pareshan tha

bhala jannat mein zer-e-saya-e-tuba wo kya jate

shahidon ko teri diwar ke saye ka arman tha

khile the fasl-e-gul mein phul yun shaKH-e-nasheman mein

gulistan mein nasheman tha nasheman mein gulistan tha

sar-e-baalin na aana tha na aae chaarasazi ko

hamare dard-e-dil ka to unhin ke pas darman tha

junun ka josh duna ho gaya fasl-e-bahaari mein

meri qismat pe kya kya KHanda-zan chaak-e-gareban tha

nishan-e-zulm-e-zalim sirf mazlumon se milta tha

asiran-e-sitam ki zat se aabaad zindan tha

zamana jis pe shaida tha usi par hum bhi shaida the

usi par hum bhi qurban the zamana jis pe qurban tha

jab un se puchhta hun kaun tha iqrar tha jis se

wo kahte hain hamin hain han hamin se ahd-o-paiman tha

na shahan-e-salaf hain aur na un ki saltanat baqi

kahan mulk-e-sulaiman tha kahan qasr-e-sulaiman tha

ajab andaz se bikhri hui thi zulf aariz par

wo zalim kis pareshan-haal ke gham mein pareshan tha

dil-e-barbaad apna banda-e-ishq-e-butan Thahra

musalman jis ko samjhe the wo kafir na-musalman tha

hamari lash par kis naz se kahte hain wo hans kar

nahin malum kya 'naushad' tere dil mein arman tha