حضور پہلے نظارے بنائے جاتے ہیں

حضور پہلے نظارے بنائے جاتے ہیں

پھر اس کے بعد نظریے بنائے جاتے ہیں

ہمیں خبر ہے کہ لہریں اجاڑ دیں گی انہیں

ہم اپنی ضد میں گھروندے بنائے جاتے ہیں

یہی سبب ہے کہ میں تیرگی کا قائل ہوں

میں جانتا ہوں اجالے بنائے جاتے ہیں

بنا رہا ہے جو کشتی اسے نہیں معلوم

سفر سے پہلے ارادے بنائے جاتے ہیں

میں سوچتے ہوئے پہنچا ہوں اس جگہ کہ جہاں

تصورات کے سانچے بنائے جاتے ہیں

درخت چھاؤں مسافر سفر تھکن منزل

طرح طرح کے معمے بنائے جاتے ہیں