ibaraten chamak rahi hain dil mein tere pyar ki

ibārateñ chamak rahī haiñ dil meñ tere pyaar kī

diye kī lau meñ jal rahī hai raat intizār kī

bhaTak rahī hai āsmāñ meñ aarzū kī fāḳhta

zamīñ pe zindagī paḌī hai aag meñ buḳhār kī

mirī vo manzileñ na thiiñ jo manzileñ mujhe milīñ

mirī nahīñ thī raah vo jo maiñ ne iḳhtiyār kī

jhulas ga.e nigāh ke tamām ḳhvāb aañch se

ye dāstān hai nazar pe raushnī ke vaar kī

sulā rahī hai beach raah meñ thakan hameñ 'charāġh'

jagā rahī hai justujū magar tire dayār kī

ibaraten chamak rahi hain dil mein tere pyar ki

diye ki lau mein jal rahi hai raat intizar ki

bhaTak rahi hai aasman mein aarzu ki faKHta

zamin pe zindagi paDi hai aag mein buKHar ki

meri wo manzilen na thin jo manzilen mujhe milin

meri nahin thi rah wo jo main ne iKHtiyar ki

jhulas gae nigah ke tamam KHwab aanch se

ye dastan hai nazar pe raushni ke war ki

sula rahi hai beach rah mein thakan hamein 'charagh'

jaga rahi hai justuju magar tere dayar ki