ibraton ke waste dar dar bhaTakta rah gaya

ibratoñ ke vāste dar dar bhaTaktā rah gayā

ḳhāndānī shaan ke hāthoñ meñ kaasa rah gayā

sab ke armānoñ kā sūraj jagmagā uTThā magar

ik mirī qismat kā gardish meñ sitāra rah gayā

ghar kī īñTeñ bik ga.iiñ asbāb-o-zevar bik ga.e

hai ḳhudā kā shukr himmat kā asāsa rah gayā

koshisheñ maujoñ se laḌte laḌte thak kar so ga.iiñ

Dūbne vaale kī āñkhoñ meñ kināra rah gayā

aañkh meñ jitne the aañsū dhīre dhīre bah ga.e

dil kā jo bhī zaḳhm thā taaza kā taaza rah gayā

be-zamīroñ ke shikam ko rizq kī qillat na thī

bas anā ke sāmne faaqa hī faaqa rah gayā

saarī qadreñ vaqt kī āñdhī uḌā kar le ga.ī

nasl-e-nau ke rū-ba-rū maazī kā ḳhāka rah gayā

ruuh ruḳhsat ho ga.ī sab rishte-nāte chhoḌ kar

rah gayā bas jism kā ḳhālī lifāfa rah gayā

rafta rafta miT ga.e 'ahsan' sabhī dilkash nuqūsh

bas ġhubār-e-vaqt kā chehre pe ġhāza rah gayā

ibraton ke waste dar dar bhaTakta rah gaya

KHandani shan ke hathon mein kasa rah gaya

sab ke armanon ka suraj jagmaga uTTha magar

ek meri qismat ka gardish mein sitara rah gaya

ghar ki inTen bik gain asbab-o-zewar bik gae

hai KHuda ka shukr himmat ka asasa rah gaya

koshishen maujon se laDte laDte thak kar so gain

Dubne wale ki aankhon mein kinara rah gaya

aankh mein jitne the aansu dhire dhire bah gae

dil ka jo bhi zaKHm tha taza ka taza rah gaya

be-zamiron ke shikam ko rizq ki qillat na thi

bas ana ke samne faqa hi faqa rah gaya

sari qadren waqt ki aandhi uDa kar le gai

nasl-e-nau ke ru-ba-ru mazi ka KHaka rah gaya

ruh ruKHsat ho gai sab rishte-nate chhoD kar

rah gaya bas jism ka KHali lifafa rah gaya

rafta rafta miT gae 'ahsan' sabhi dilkash nuqush

bas ghubar-e-waqt ka chehre pe ghaza rah gaya