ibtida-o-intiha hai aaina-dar-aina

ibtidā-o-intihā hai ā.ina-dar-ā.ina

'aks merā boltā hai ā.ina-dar-ā.ina

kaun guzrā hai mire dil se ḳhayāloñ kī tarah

jaane kis kā naqsh-e-pā hai ā.ina-dar-ā.ina

jaise ho tadbīr-dar-tadbīr rāz-e-zindagī

aadmī yuuñ dekhtā hai ā.ina-dar-ā.ina

dil-ba-dil sail-e-tamannā rag-ba-rag zauq-e-hayāt

sochtā huuñ kyā chhupā hai ā.ina-dar-ā.ina

māniye to munkashif hai dil pe misl-e-mahr-o-māh

sochiye to phir ḳhudā hai ā.ina-dar-ā.ina

maiñ huuñ ḳhud apnī shikastoñ kī sadā-e-bāzgasht

tū milā bhī to milā hai ā.ina-dar-ā.ina

rāz-andar-rāz hai is tarh saarī kā.enāt

jaise koī aa.ina ho ā.ina-dar-ā.ina

jo ḳhud apnī aag meñ jaltā rahā hai 'umr-bhar

vo 'sirāj' ab ke jalā hai ā.ina-dar-ā.ina

ibtida-o-intiha hai aaina-dar-aina

'aks mera bolta hai aaina-dar-aina

kaun guzra hai mere dil se KHayalon ki tarah

jaane kis ka naqsh-e-pa hai aaina-dar-aina

jaise ho tadbir-dar-tadbir raaz-e-zindagi

aadmi yun dekhta hai aaina-dar-aina

dil-ba-dil sail-e-tamanna rag-ba-rag zauq-e-hayat

sochta hun kya chhupa hai aaina-dar-aina

maniye to munkashif hai dil pe misl-e-mahr-o-mah

sochiye to phir KHuda hai aaina-dar-aina

main hun KHud apni shikaston ki sada-e-bazgasht

tu mila bhi to mila hai aaina-dar-aina

raaz-andar-raaz hai is tarh sari kaenat

jaise koi aaina ho aaina-dar-aina

jo KHud apni aag mein jalta raha hai 'umr-bhar

wo 'siraj' ab ke jala hai aaina-dar-aina