ibtida se main intiha ka hun

ibtidā se maiñ intihā kā huuñ

maiñ huuñ maġhrūr aur balā kā huuñ

tū bhī hai ik charāġh-e-mohlat-e-shab

maiñ bhī jhoñkā kisī havā kā huuñ

pheñk mujh par kamand-e-nāz apnī

aaj maiñ ham-safar sabā kā huuñ

jis meñ malbūs chāñd rahtā hai

maiñ bhī takmā usī qabā kā huuñ

mujh ko apnā samajh rahī hai tū

maiñ kisī aur bevafā kā huuñ

is meñ merī ḳhatā nahīñ koī

murtakib bas isī ḳhatā kā huuñ

zindagī maiñ abhī salāmat huuñ

maiñ asar terī bad-duā kā huuñ

mujh pe rakhtā hai tohmat-e-ilhād

maiñ bhī banda isī ḳhudā kā huuñ

ujḌe ḳhemoñ kā sogvār huuñ maiñ

maiñ azādār karbalā kā huuñ

mujh ko 'shāhid'-kamāl kahte haiñ

maiñ bhī shā.ir huuñ aur balā kā huuñ

ibtida se main intiha ka hun

main hun maghrur aur bala ka hun

tu bhi hai ek charagh-e-mohlat-e-shab

main bhi jhonka kisi hawa ka hun

phenk mujh par kamand-e-naz apni

aaj main ham-safar saba ka hun

jis mein malbus chand rahta hai

main bhi takma usi qaba ka hun

mujh ko apna samajh rahi hai tu

main kisi aur bewafa ka hun

is mein meri KHata nahin koi

murtakib bas isi KHata ka hun

zindagi main abhi salamat hun

main asar teri bad-dua ka hun

mujh pe rakhta hai tohmat-e-ilhad

main bhi banda isi KHuda ka hun

ujDe KHemon ka sogwar hun main

main azadar karbala ka hun

mujh ko 'shahid'-kamal kahte hain

main bhi shair hun aur bala ka hun