idhar bhi kabhi chaaragar dekh lena

idhar bhī kabhī chārāgar dekh lenā

harā kyoñ hai zaḳhm-e-jigar dekh lenā

ujāle yahīñ aa ke dam toḌte haiñ

kabhī shaam ko merā ghar dekh lenā

girāñ tujh pe guzre na merī rifāqat

kaḌe kos haiñ ham-safar dekh lenā

nahīñ aarzī dil kī ġham-parvarī kuchh

yūñhī apnī hogī basar dekh lenā

ye hangāma-e-qasr-e-parvez ai dil

rahegā faqat raat bhar dekh lenā

bapā hashr kar degā rāhat-kadoñ meñ

mire ranj-o-ġham kā asar dekh lenā

sitamgār kā jashn-e-rāmish-garī hai

faqat ek raqs-e-sharar dekh lenā

shabistān-e-ishrat meñ jo parda-gar haiñ

vahī hoñge phir parda-dar dekh lenā

fasāna mirā ġhaur se sun rahā thā

hai nam chashm-e-najm-e-sahar dekh lenā

idhar bhi kabhi chaaragar dekh lena

hara kyon hai zaKHm-e-jigar dekh lena

ujale yahin aa ke dam toDte hain

kabhi sham ko mera ghar dekh lena

giran tujh pe guzre na meri rifaqat

kaDe kos hain ham-safar dekh lena

nahin aarzi dil ki gham-parwari kuchh

yunhi apni hogi basar dekh lena

ye hangama-e-qasr-e-parwez ai dil

rahega faqat raat bhar dekh lena

bapa hashr kar dega rahat-kadon mein

mere ranj-o-gham ka asar dekh lena

sitamgar ka jashn-e-ramish-gari hai

faqat ek raqs-e-sharar dekh lena

shabistan-e-ishrat mein jo parda-gar hain

wahi honge phir parda-dar dekh lena

fasana mera ghaur se sun raha tha

hai nam chashm-e-najm-e-sahar dekh lena