idhar dekh lena udhar dekh lena

idhar dekh lenā udhar dekh lenā

phir un kī taraf ik nazar dekh lenā

vo merā na kahne meñ kah jaanā sab kuchh

vo un kā achānak idhar dekh lenā

abas merī jānib se tū bad-gumāñ hai

nahīñ mudda.ā kuchh magar dekh lenā

mire ġham-kade meñ vo ā.eñge ik din

jhalak uTTheñge bām-o-dar dekh lenā

'asar' arz-e-hāl un se be-soche-samjhe

kahā thā ki pahle nazar dekh lenā

idhar dekh lena udhar dekh lena

phir un ki taraf ek nazar dekh lena

wo mera na kahne mein kah jaana sab kuchh

wo un ka achanak idhar dekh lena

abas meri jaanib se tu bad-guman hai

nahin muddaa kuchh magar dekh lena

mere gham-kade mein wo aaenge ek din

jhalak uTThenge baam-o-dar dekh lena

'asar' arz-e-haal un se be-soche-samjhe

kaha tha ki pahle nazar dekh lena