ادھر ہے باد سموم نالاں ادھر ہے برق تپاں بھی عاجز

ادھر ہے باد سموم نالاں ادھر ہے برق تپاں بھی عاجز

مری بہاروں سے ہو گئی اب حرام زادی خزاں بھی عاجز

یہ ہوش و عقل و خرد کی خامی پہ حرص رہبر کی تشنہ کامی

کہ جس کو سیراب کرتے کرتے ہوا ہے اکثر کنواں بھی عاجز

کیا ہے یوں عزم مستقل نے خلاف ان کے محاذ قائم

کہ آج کل ہے ستم گروں کی چنیں بھی عاجز چناں بھی عاجز

تمام رندوں نے مے کدے میں اب ایسی شورش مچا رکھی ہے

کہ شیشے الٹے صراحی اوندھی ہے میرا پیر مغاں بھی عاجز

جفائیں دن رات ڈھاتے ڈھاتے ستم کے بانی بھی تھک نہ جائیں

شکار چوہوں کا کرتے کرتے نہ ہوں کہیں بلیاں بھی عاجز

حریم ناز و ادا میں ان کی یہ کون دہقانی بولتا ہے

ہے نا تراشیدہ گفتگو سے زباں بھی لطف زباں بھی عاجز