idhar hai baad-e-sumum nalan udhar hai barq-e-tapan bhi aajiz

idhar hai bād-e-sumūm nālāñ udhar hai barq-e-tapāñ bhī aajiz

mirī bahāroñ se ho ga.ī ab harām-zādī ḳhizāñ bhī aajiz

ye hosh-o-aql-o-ḳhirad kī ḳhāmī pe hirs-e-rahbar kī tishna-kāmī

ki jis ko sairāb karte karte huā hai aksar kuaañ bhī aajiz

kiyā hai yuuñ azm-e-mustaqil ne ḳhilāf un ke mahāz qaa.em

ki aaj kal hai sitamgaroñ kī chunīñ bhī aajiz chunāñ bhī aajiz

tamām rindoñ ne mai-kade meñ ab aisī shorish machā rakhī hai

ki shīshe ulTe surāhī auñdhī hai merā pīr-e-muġhāñ bhī aajiz

jafā.eñ din raat dhāte dhāte sitam ke baanī bhī thak na jaa.eñ

shikār chūhoñ kā karte karte na hoñ kahīñ billiyāñ bhī aajiz

harīm-e-nāz-o-adā meñ un kī ye kaun dahqānī boltā hai

hai nā-tarāshīda guftugū se zabāñ bhī lutf-e-zabāñ bhī aajiz

idhar hai baad-e-sumum nalan udhar hai barq-e-tapan bhi aajiz

meri bahaaron se ho gai ab haram-zadi KHizan bhi aajiz

ye hosh-o-aql-o-KHirad ki KHami pe hirs-e-rahbar ki tishna-kaami

ki jis ko sairab karte karte hua hai aksar kuan bhi aajiz

kiya hai yun azm-e-mustaqil ne KHilaf un ke mahaz qaem

ki aaj kal hai sitamgaron ki chunin bhi aajiz chunan bhi aajiz

tamam rindon ne mai-kade mein ab aisi shorish macha rakhi hai

ki shishe ulTe surahi aundhi hai mera pir-e-mughan bhi aajiz

jafaen din raat dhate dhate sitam ke bani bhi thak na jaen

shikar chuhon ka karte karte na hon kahin billiyan bhi aajiz

harim-e-naz-o-ada mein un ki ye kaun dahqani bolta hai

hai na-tarashida guftugu se zaban bhi lutf-e-zaban bhi aajiz