idhar se bhi to hawa-e-bahaar guzri hai

idhar se bhī to havā-e-bahār guzrī hai

kuchh ek baar nahīñ baar baar guzrī hai

gilā nahīñ ye faqat arz-e-hāl hai ai dost

tire baġhair bahut be-qarār guzrī hai

vahī to merī hayāt-e-safar kī pūñjī hai

vo zindagī jo sar-e-rahguzār guzrī hai

qalam liye hue sochā kiye ki kyā likheñ

kuchh is tarah bhī shab-e-intizār guzrī hai

bhulā sakeñge na us ko qafas meñ ai sayyād

vo do ghaḌī jo sar-e-shāḳh-sār guzrī hai

kabhī kabhī to mirī bar-mahal ḳhamoshī bhī

unheñ fuġhāñ kī tarah nāgavār guzrī hai

huiiñ jo dil se mire bad-gumāniyāñ un ko

to shā.irī bhī mirī nāgavār guzrī hai

ḳhizāñ meñ bhī na kisī kī ḳhudā kare guzre

vo jis tarah mirī fasl-e-bahār guzrī hai

ubhar ga.ī hai kahīñ par 'razā' jo talḳhī-e-fikr

mire mizāj-e-ġhazal par vo baar guzrī hai

idhar se bhi to hawa-e-bahaar guzri hai

kuchh ek bar nahin bar bar guzri hai

gila nahin ye faqat arz-e-haal hai ai dost

tere baghair bahut be-qarar guzri hai

wahi to meri hayat-e-safar ki punji hai

wo zindagi jo sar-e-rahguzar guzri hai

qalam liye hue socha kiye ki kya likhen

kuchh is tarah bhi shab-e-intizar guzri hai

bhula sakenge na us ko qafas mein ai sayyaad

wo do ghaDi jo sar-e-shaKH-sar guzri hai

kabhi kabhi to meri bar-mahal KHamoshi bhi

unhen fughan ki tarah nagawar guzri hai

huin jo dil se mere bad-gumaniyan un ko

to shairi bhi meri nagawar guzri hai

KHizan mein bhi na kisi ki KHuda kare guzre

wo jis tarah meri fasl-e-bahaar guzri hai

ubhar gai hai kahin par 'raza' jo talKHi-e-fikr

mere mizaj-e-ghazal par wo bar guzri hai