idhar to hum jaan kho rahe hain udhar wo ulfat se ro rahe hain

idhar to ham jaan kho rahe haiñ udhar vo ulfat se ro rahe haiñ

kudūrateñ umr bhar kī dil se vo aaj ashkoñ meñ dho rahe haiñ

na baaz rakh ham ko rone se tū gireñ jo ashkoñ ke daane bahattar

ye kisht-e-hasrat meñ apnī hamdam umiid kā tuḳhm bo rahe haiñ

idhar taraqqī ḳhayāl ko hai udhar taraqqī jamāl ko hai

vahāñ to madd-e-nazar hai surma yahāñ tasavvur meñ ro rahe haiñ

jahāñ huā tifl koī paidā kahā ye maañ ne abul-bashar kī

mirī bhī āġhosh hai kushāda abas ye sāmān ho rahe haiñ

kiyā hai be-jurm qatl mujh ko hujūm-e-aġhyār-o-āshnā meñ

aur is pe dekho DhiTā.ī ashkoñ se dāman apnā bhigo rahe haiñ

na pūchho kuchh ma.asiyat kā aalam farishto ham kyā ki tum ne bachte

haqīqat is kī unhīñ se pūchho sara-e-duniyā meñ jo rahe haiñ

ḳhabar visāl-e-adū kī sun kar visāl ke ma.anī sochte haiñ

unhīñ ko vaañ kuchh nahīñ hai shādī ki ḳhush yahāñ ham bhī ho rahe haiñ

gila abas un se kiije 'āqil' kiyā hai qismat ne un ko ġhāfil

jo dar pe jā kar pukārā maiñ ne to bole kah do ki so rahe haiñ

idhar to hum jaan kho rahe hain udhar wo ulfat se ro rahe hain

kuduraten umr bhar ki dil se wo aaj ashkon mein dho rahe hain

na baz rakh hum ko rone se tu giren jo ashkon ke dane bahattar

ye kisht-e-hasrat mein apni hamdam umid ka tuKHm bo rahe hain

idhar taraqqi KHayal ko hai udhar taraqqi jamal ko hai

wahan to madd-e-nazar hai surma yahan tasawwur mein ro rahe hain

jahan hua tifl koi paida kaha ye man ne abul-bashar ki

meri bhi aaghosh hai kushada abas ye saman ho rahe hain

kiya hai be-jurm qatl mujh ko hujum-e-aghyar-o-ashna mein

aur is pe dekho DhiTai ashkon se daman apna bhigo rahe hain

na puchho kuchh masiyat ka aalam farishto hum kya ki tum ne bachte

haqiqat is ki unhin se puchho sara-e-duniya mein jo rahe hain

KHabar visal-e-adu ki sun kar visal ke mani sochte hain

unhin ko wan kuchh nahin hai shadi ki KHush yahan hum bhi ho rahe hain

gila abas un se kije 'aqil' kiya hai qismat ne un ko ghafil

jo dar pe ja kar pukara main ne to bole kah do ki so rahe hain