idhar ye haal ki chhune ka iKHtiyar nahin

idhar ye haal ki chhūne kā iḳhtiyār nahīñ

udhar vo husn ki āñkhoñ pe e'tibār nahīñ

maiñ ab kisī kī bhī ummīd toḌ saktā huuñ

mujhe kisī pe bhī ab koī e'tibār nahīñ

tum apnī hālat-e-ġhurbat kā ġham manāte ho

ḳhudā kā shukr karo mujh se be-dayār nahīñ

maiñ sochtā huuñ ki vo bhī dukhī na ho jaa.e

ye dāstān koī aisī ḳhush-gavār nahīñ

to kyā yaqīn dilāne se maan jāoge?

yaqīñ dilā.ūñ ki ye hijr dil pe baar nahīñ

qadam qadam pe na.ī Thokareñ haiñ rāhoñ meñ

dayār-e-ishq meñ koī bhī kāmgār nahīñ

yahī sukūn mirī be-kalī na ban jaa.e

ki zindagī meñ koī vaj.h-e-intizār nahīñ

ḳhudā ke baare meñ ik din zarūr socheñge

abhī to ḳhud se ta.alluq bhī ustuvār nahīñ

gila to mujh se vo kartā hai is tarah 'javvād'

ki jaise maiñ to judā.ī meñ sogvār nahīñ

idhar ye haal ki chhune ka iKHtiyar nahin

udhar wo husn ki aankhon pe e'tibar nahin

main ab kisi ki bhi ummid toD sakta hun

mujhe kisi pe bhi ab koi e'tibar nahin

tum apni haalat-e-ghurbat ka gham manate ho

KHuda ka shukr karo mujh se be-dayar nahin

main sochta hun ki wo bhi dukhi na ho jae

ye dastan koi aisi KHush-gawar nahin

to kya yaqin dilane se man jaoge?

yaqin dilaun ki ye hijr dil pe bar nahin

qadam qadam pe nai Thokaren hain rahon mein

dayar-e-ishq mein koi bhi kaamgar nahin

yahi sukun meri be-kali na ban jae

ki zindagi mein koi wajh-e-intizar nahin

KHuda ke bare mein ek din zarur sochenge

abhi to KHud se talluq bhi ustuwar nahin

gila to mujh se wo karta hai is tarah 'jawwad'

ki jaise main to judai mein sogwar nahin